古天后日誌｜中美元首會談難有驚喜 大市二萬六阻力大

11月15日，部份時間有陽光，天氣仍然乾燥，相對上周較為和暖。上周五美股喺市場消高於預期嘅通脹數據後，美股做好，三大指數上升，道指升179點；標指跟納指分別升33點及156點。通脹高企，將導致現金實際購買力下降，即係「錢變得唔值錢」，有「鱷王」之稱的全球最大對沖基金橋水始創人達里奧(Ray Dalio)警告，高通脹正蠶食實際財富，而持有現金嘅人，更加係蝕鑊甘。唔知係咪因為通脹關係，鱷王以買股抵抗通脹，更大舉買入MSCI新興市場交易所買賣基金(EEM)。

與此同時，達利奧旗下嘅全球最大對沖基金橋水早前向美國證交會(SEC)呈交記錄持倉變動13F文件，披露9月底持有阿里巴巴(美股︰BABA)約329萬股，按季大增1.31倍，總值約4.87億美元，為第7大持倉。該基金上季不但增持京東集團(美股︰JD)、拼多多(美股︰PDD)及蔚來汽車(美股︰NIO)等明星中概股，其中，京東貨值約1.43億美元（約11.15億港元)，連上市未夠一周即被內地重錘整治的滴滴出行(美股︰DIDI)也不放過，首度買入約899萬股，現值7,003.4萬美元(約5.46億港元)。而目前橋水第二大持倉乃中資股權重達33.5%的EEM，持倉按季大增逾8倍，總值達到10.14億美元。咁嘅配置，反映鱷王似乎無懼內地監管，極度睇好中資股前景。

未知鱷王舉動，跟中美元首會談有冇關係，但古天后認為雙方會談未必有實質結果，華府對中國高科技行業施加的限制可能會維持，但有機會朝降低部分關稅邁進，始終喺通脹問題下，降低關稅係其中一個緩解通脹方法。而市場一直憧憬內地監管已近尾聲，只係未有力量推升大市，估計恒指短期可能喺25000至26000之間穿梭。

而鱷王狂掃中概股，可能係外國投資者認為新經濟板塊監管最壞情況已過，新經濟股或在今季見底。內地即使不會降準或減息，也可能針對某些行業「放水」，如房地產及能源等。而古天后則仍然睇好環保相關嘅新能源及新能源汽車板塊，呢類股份仍值得逢回吐吸納。留意今個星期有阿里(09988)跟京東(09618)派成績表，即管睇睇會唔會業績前落鑊，兩者比較古天后都係偏好京東多少少。

古天后

(徐狄怡，證監會持牌人)