星島獨家｜張振朗：雙腿勁抽筋 好驚出事

晃眼十年，人生如戲，張振朗從無對白的二打六走上獨當一面的男主角，用來自他主演劇集《拳王》中的四字座右銘「搏盡、無悔」，正好呼應他在演藝路上咬着牙關堅毅不屈的鬥志。既要捱餓又受皮肉之苦，雖然在艱辛過程中曾流下男兒淚，但自認個性遇強愈強的他，會繼續保持初心迎戰下一個十年。

　　以打拳為題材之台慶劇《拳王》由視帝黎耀祥帶領下與一眾新星擔任主角，個個操得一副筋肉人身形應戰，張振朗也嚴陣以待，花了長達一年時間收身騷肌，令觀眾眼前一亮。過往在螢幕上，觀眾看到張振朗活潑一面，今次因為角色經歷親人離世的沉重打擊，變得個性森沉、寡言，一反張振朗過去所演過的角色，「人人都話呢個好唔張振朗，無論身形、髮型、身體、膚色、樣貌狀態都跟過往有很大差別。」他感激監製陳耀全給予機會，為了不負眾望，所以傾盡全力演出。

　　張振朗認為拍攝《拳王》最難之處是既要兼顧演戲，又要操弗外型、仲要連場打擂台激戰，三者並存倍添吃力。最深刻記得有十多日拍攝打戲場面，基本上完全沒開口說話，「我想慳返啖氣留嚟出拳，一直覺得自己有無限活力，但嗰刻真係唔敢。」不用埋位時，他會坐在一邊靜養，有如真正面對拳手生涯培養情緒一樣，令角色有活着感覺。張振朗曾經拍過《包青天》飾演展昭一角，同樣要飛簷走壁拍打戲，「當時我認為冇一套戲辛苦過包青天，估唔到一山還有一山高。」

難敵肚餓曾偷食

　　接到角色前後，張振朗足足花了一年時間重整身形和體能，雖然艱辛，但幸好有一班兄弟齊齊操fit互相激勵，有苦大家知。回望當時堪稱人生最fit階段，張振朗笑言：「好驚一生人得一次，但好滿意。」要持續一年收身狀態，一星期幾乎做足六日gym，對他而言，無論在飲食及體能方面，都要講求無比毅力，是最大挑戰。他回想最初減磅時還好，再進一步每天要吃一大袋白烚雞肉加少許飯，至尾段則食番薯，很多時以雞肉攪碎加蛋白粉為之一餐，最痛苦時試過偷食糖果來滿足心靈，他說：「持續四個月，真係食到唔想食，覺得打緊擂台時好肚餓，好辛苦仲要食呢啲，見其他人食緊薯片同開飯，嗰種感覺好辛苦，身形真係得來不易，但好開心估唔到自己做到。」他叫觀眾細心留意劇情，便會看到他身形極大變化。

打擂台抽筋驚到喊

　　減磅過程承受重大壓力，煞科日張振朗終於留下男兒淚，再次憶述苦況時仍歷歷在目，曾經擔心捱不下去，他說：「拍完第二日擂台戲後，返屋企一雙大腿抽筋半個鐘，好擔心自己出事好驚，每日要集中打十小時，有一種絕望感覺。屋企人幫我按摩時就忍唔住喊咗出嚟，真係好疲累，嗰刻諗點解要咁辛苦，但係個過程，我好Enjoy亦好興奮。最後一日喊係因為覺得我終於捱過咗，張振朗又行了一大步，演藝生涯路有唔同站，以前曾經被人話翻版張智霖、翻版黃宗澤、好多意見聲音，現在終於有另一面，十年來觀眾認識到張振朗嘅轉變。」由《反黑路人甲》及《機場特警》開始，已成功搣甩翻版稱號，建立自我形象，令張振朗心底振奮。

黎耀祥無私教導

　　在劇中張振朗會與蔡潔發展感情線，但二人性格南轅北轍，各走極端，會擦出非一般愛火花。另外和朱敏瀚又有段曖昧兄弟情，他笑說：「唔知佢係咪暗戀我？」而重頭戲則落在他與三奪視帝黎耀祥（祥哥）身上，劇情交代祥哥是一位拳壇具知名度教練，張振朗要挑戰巨人，他有感情節和現實相似，不過並非挑戰，而是請教祥哥。他承認最初合作時充滿壓力，幸獲前輩悉心指點，張振朗說：「祥哥唔會主動話你聽你做成點，由你自由發揮後，你去問佢，佢好願意分享，無私教導，變相我每一場戲都會問佢，佢好似『逗起』我一樣，試過有場戲一句簡單對白，『擂台我搭，規矩我定』，你感受到個擂台飛埋嚟一樣，真係好犀利，好多謝祥哥，入行10年先遇上合作機會，唔知幾時再有機會請教，問到我自己都覺得煩。」

「十年初心不變」

　　回望十年，張振朗無論性格、演技均漸趨成熟，現年34歲的他更開始散發陣陣男人味，尤其在劇中黑黑實實好man感覺，回想由訓練班入行，算是由低做起，晃眼十年躍升上男主角，感覺時光飛逝，還記得最初只是寂寂無名捱騾仔，他坦言從沒想過會當上男一，並說：「早期時唔知自己會點，都唔敢問自己幾時做男主角，對我來講太遠，先有對白、一單case中的主角、逐步逐步來，眨吓眼到現在叫做主角，不經不覺行到呢一步，所有嘢都好像昨日發生一樣，我對演戲一直都保持初心，有一場戲要我去演，我會好開心返去鑽研，我依然係十年前訓練班嘅我。」

「紀錄一生一次角色」

　　張振朗獲力捧後一步步走出成績，前兩年先後在TVB獲得「飛躍進步男藝員」和「受歡迎電視男角色」兩個獎項，今年憑《拳王》海正藍一角，有望邁向第三個獎項，且有機會爭視帝，他謙虛說：「獎項畀咗你，但觀眾唔鍾意或唔肯定，攞嚟有冇意思？都未必會開心，反而若果真係畀咗我，意義來自於記錄低《拳王》角色。」張振朗坦言性格是愈難愈愛挑戰的人，若日後再讓他演出雷同角色則必能會尋求突破，提議可以玩肥仔打拳，更揚言今次絕密演出可一不可再，尤其身上一排朱古力腹肌：「暫時只可以影到呢次！當下已經盡晒全力。」踏入下一個十年，張振朗雖未有遠大目標，但會保持初心，希望感染更多人演戲。

撰文∣卓寶花　攝影∣陳敏華

原文刊於《星島日報》名人雜誌（逢周日見報）