馮允謙被狂讚靚仔笑出腰果眼 譚旻萱為談情棄穿高踭鞋

馮允謙（Jay）新歌《冬日寂寞考》MV邀得「E女郎」譚旻萱（Mandy）任女主角。身材高佻的Mandy，令Jay一度懊惱，因為高度相約，埋位前他問Mandy：「你一陣可唔可以唔好著高踭鞋？」爽朗的Mandy立即除鞋。Mandy在MV中是女明星，入住酒店隔離，加上情傷，心情極差，終日借酒消愁，靚仔服務生Jay為她每日送餐時送上小驚喜，又唱歌又送心意卡氹她開心，冧招百出。Jay笑說：「佢因為失戀成日飲酒，我睇唔過眼佢飲啲酒太渣，所以請佢飲靚嘢！」

得知Mandy都喜歡打籃球後，Jay立即邀請她切磋球技，還建議拍成節目。雖然未落場打波，但二人已見默契，拍攝十幾小時後已凌晨時份，他們除了靠手上的熱咖啡提神，就算不用埋位都在旁為對方打氣。鏡頭後的Mandy落力在旁講笑話和狂讚Jay好靚仔，讓他保持開朗狀態；同樣當Mandy埋位時，Jay就在旁聲演對白幫她入戲。之後Jay坦言：「Mandy第一次讚靚仔時我信㗎，但佢講多幾次我就有啲懷疑。」他笑問Mandy：「你同Edan（呂爵安）拍MV時係咪都有讚佢靚仔？」Mandy哈哈大笑解釋：「我有望住佢講，但我唔敢望住你講，因為我對住你真係怕醜。」讓Jay哭笑不得。