古天后日誌｜美股無懼通脹升至39年高位 市場已有提早收水準備

12月13日，天晴乾燥，氣溫下降，早晚清涼。上周五美國公布通脹數據，美國11月消費物價指數(CPI)按年升6.8%，為自1982年6月來新高，符合預期6.8%；按月升0.8%，高於預期0.7%。扣除食品和能源嘅核心CPI按年漲4.9%，亦是自1991年6月來新高，按月升0.5%，均符預期。雖然通脹創39年新高，不過市場基本上已消化聯儲局加快「收水」，美股繼續向好，道指升216點；標指升44點，創收市新高；納指亦升113點。

由於聯儲局已不斷釋出加息訊號，預期聯儲局即使加快加息步伐，對市場衝擊有限，不過由於華爾街對於美股後市睇法有分歧，預期美股將會轉趨波動。5名Apple Watch Series 6用家透過加州聯邦法院向蘋果公司(Apple Inc.)提出集體訴訟，稱其鋰電池容易發脹，並造成屏幕破碎等損壞，令用家因此承受身體傷害，指摘Apple在知情的情況下仍推出產品。呢個消息或者令蘋概股今日較為波動。

聯儲局加快「收水」已成定局，聯儲局將會喺今個星期議息，唔排除喺今次會議上討論加快縮減買債，有估計將明年第一季或完成退市，並將加息時間提早。有專家預期，高通脹水平起碼會持續至明年上半年，甚至可能促使拜登政府行動，削減部分對華關稅。如此一來，聯儲局收水唔單止市場已接受，更有可能成為美對華削減部份關稅誘因，分分鐘加息反變為股市炒作藉口。

至於美國經濟明年應該唔會太差，作為經濟支柱的消費仍然強勁，暫時未見「滯脹」風險。不過，美國10年期國債孳息率上周五僅1.486厘，好似完全未受通脹數據影響。長期債息偏軟，或反映市場對經濟前景有疑慮，如擔心聯儲局「收水」太快破壞復甦。

睇返家陣貨幣政策趨勢，10年期債息將回到1.5至兩厘，美匯指數亦會進一步上漲。黃金理論上抗通脹表現較佳，惟虛擬貨幣崛起為金價表現添上變數，呢個係窒礙金價上漲嘅原因。

古天后

(徐狄怡，證監會持牌人)