頭條戲場丨《蜘蛛俠：不戰無歸》點解可以咁好睇㗎

一散場即刻喺社交平台激動地打咗呢堆字，「大叫咗四次，拍咗十幾次手，眼濕濕咗幾次，幾十個彩蛋，大酬賓咁樣，拍到咁以後啲超級英雄電影點跟？」已再買 IMAX飛睇多次，有無咁誇?有呀。(剛上映) 撰文:廖思慧

電影昨日在港上映，為怕多口仔劇透唔生性，好多《蜘蛛俠》Fans一早訂飛搶先睇，首日票房勁收逾900萬。因為全世界都知《蜘蛛俠》真正身份，Peter Parker（Tom Holland飾）嘅生活從此發生巨變，起居飲食被長期監視，女友MJ(Zendaya飾)及老友Ned(Jacob Batalon飾)都被牽連冇辦法再過正常人生活，蜘蛛仔惟有搵奇異博士（Benedict Cumberbatch飾）幫忙，意外打開咗多重宇宙，愈幫愈衰，世界從此大亂。

Peter Parker終於去到高中生涯最後一年，同時亦要面對秘密身份遭揭露的難關。

MJ講過唔想再盪嚟盪去，但為避記者及市民嘅追蹤冇辦法啦。

賣情懷袋定紙巾
一堆反派人物如八爪魚博士、沙人、蜥蜴人、綠魔及電魔早知會現身，Marvel總裁暨MCU「老大」Kevin Feige透露一係唔拍一拍就要搵返原裝演員參演《不戰無歸》，「咁先可以將整個蜘蛛俠宇宙的DNA發酵。」其實全片講成長玩情懷，好多幕都睇動眼濕濕。蜘蛛仔由首集傻吓傻吓嘅小朋友，到第二集失去亦師亦友的鐵甲奇俠再到今集自己瀨咗嘢自己解決返，觀眾見證佢成長，有唔少位好催淚。

Alfred Molina飾演的八爪魚博士一出場好有霸氣。

八爪魚博士力敵蜘蛛俠，後者差啲唔夠打。

今集，綠魔(Willem Dafoe飾)搞到蜘蛛俠好傷心。

Jamie Foxx飾的電魔最冥頑不靈。

真係睇到好興奮
作為三部曲的大結局，無論劇情、動作定致敬位都計算得啱啱好，全片148分鐘有好笑有感動又有驚喜，大酬賓式乜都有，故事舖排非常完整，中段至後期有大量拍手位，絕對係人生睇過最好睇嘅超級英雄電影，其實好辛苦先寫到呢篇文，基本上三個字已完結，就係「入場啦。」溫馨提示:記得睇到尾。

戲中大量動作場面都由Tom Holland親身演出。

最強三人組繼續合作抗敵，Ned仲學識用奇異博士嘅道具打開「傳送門」。