头条戏场丨《蜘蛛侠：不战无归》点解可以咁好睇㗎

一散场即刻喺社交平台激动地打咗呢堆字，「大叫咗四次，拍咗十几次手，眼湿湿咗几次，几十个彩蛋，大酬宾咁样，拍到咁以后啲超级英雄电影点跟？」已再买 IMAX飞睇多次，有无咁夸?有呀。(刚上映) 撰文:廖思慧

电影昨日在港上映，为怕多口仔剧透唔生性，好多《蜘蛛侠》Fans一早订飞抢先睇，首日票房劲收逾900万。因为全世界都知《蜘蛛侠》真正身份，Peter Parker（Tom Holland饰）嘅生活从此发生巨变，起居饮食被长期监视，女友MJ(Zendaya饰)及老友Ned(Jacob Batalon饰)都被牵连冇办法再过正常人生活，蜘蛛仔惟有搵奇异博士（Benedict Cumberbatch饰）帮忙，意外打开咗多重宇宙，愈帮愈衰，世界从此大乱。

Peter Parker终于去到高中生涯最后一年，同时亦要面对秘密身份遭揭露的难关。

MJ讲过唔想再荡嚟荡去，但为避记者及市民嘅追踪冇办法啦。

卖情怀袋定纸巾
一堆反派人物如八爪鱼博士、沙人、蜥蜴人、绿魔及电魔早知会现身，Marvel总裁暨MCU「老大」Kevin Feige透露一系唔拍一拍就要搵返原装演员参演《不战无归》，「咁先可以将整个蜘蛛侠宇宙的DNA发酵。」其实全片讲成长玩情怀，好多幕都睇动眼湿湿。蜘蛛仔由首集傻吓傻吓嘅小朋友，到第二集失去亦师亦友的铁甲奇侠再到今集自己濑咗嘢自己解决返，观众见证佢成长，有唔少位好催泪。

Alfred Molina饰演的八爪鱼博士一出场好有霸气。

八爪鱼博士力敌蜘蛛侠，后者差啲唔够打。

今集，绿魔(Willem Dafoe饰)搞到蜘蛛侠好伤心。

Jamie Foxx饰的电魔最冥顽不灵。

真系睇到好兴奋
作为三部曲的大结局，无论剧情、动作定致敬位都计算得啱啱好，全片148分钟有好笑有感动又有惊喜，大酬宾式乜都有，故事铺排非常完整，中段至后期有大量拍手位，绝对系人生睇过最好睇嘅超级英雄电影，其实好辛苦先写到呢篇文，基本上三个字已完结，就系「入场啦。」温馨提示:记得睇到尾。

戏中大量动作场面都由Tom Holland亲身演出。

最强三人组继续合作抗敌，Ned仲学识用奇异博士嘅道具打开「传送门」。