林芊妤爆老公私藏崩壞照 認定另一半愛她的內在美

林芊妤（Coffee）成功由藝人轉型做瑜伽導師，做Youtuber之餘又推出自家品牌運動服，鏡頭前永遠都是靚靚示人。不過，昨日Coffee突然在社交網上載一系列崩壞照片，透露原本想將老公幫囝囝拍攝的影片傳自己，意外發現這批一直潛藏在老公手機的「傑作」，包括偷拍Coffee熟睡、頭髮油笠笠戙高腳食飯、素顏爆瘡，仲有一張超高難度用反轉用腳板對住BB的相片，望落猶如經典電影《家有喜事》的程大嫂，每一張都顛覆平時Coffee自我塑造、身材fit爆的索女形象。

 

Coffee呢招反腳板，真係唔係人人做得到，難得BB完全冇反應。

素顏生粒粒，但皮膚都一樣咁好。

偷錫老婆，再自拍。

同BB瞓覺都好性感。

 

難得Coffee唔介意公諸同好，寫著：「剛才想把老公拍BB的影片傳給自己，然後仔細一看他的電話相簿，我真的崩壞了!!!平常連一張照片都不肯幫我拍，但相簿內都是我的醜照或長痘痘時的照片，我想這個人⋯⋯⋯⋯必定是愛上了我的內在啦（安慰自己中）看來我要將自己一大堆j圖放在他電話。」Coffee還寫了夫妻之間的對話，當老公讚她「這樣很可愛」時，Coffee反問可愛的點在哪裏？老公直率地說：「真實的你才是最可愛的！」爆笑之餘，仲非常之冧。

 

呢個Look都敢放上網，真係需要好大勇氣。

好溫馨。

 

Coffee平時都係靚靚示人，同老公超恩愛。

擁健美身材。