古天后日誌｜北水仍休假 港股開局方向未明

1月3日，大部份時間天晴，間中風勢較大。上周五美股無乜方向，三大指數偏軟。2022年首個交易日，港股應該都係無乜方向，主要係內地假期，北水仍休假，預計今日交投較為淡靜。回顧過去一年，喺多國央行面對疫情所困而繼續大舉「放水」下，歐美股市普遍錄得雙位數字的升幅，其中美股三大指數道指、標指及納指分別累漲18.73%、26.89%及21.39%。

相反，中港兩地股市全年表現強差人意，但內地滬綜指仍錄得4.8%升幅，叫做好過無；而港股埋單則跌O左14%，全球股市中表現排第尾，亦係10年以嚟表現至差嘅一年，主要係內地監管風暴及內房債務危機所拖累。

踏入新一年，無論去年大家戰績如何，總要向前望，只係全球通脹升溫，各國部署收水，再加上疫情未了，中美博弈，內地監管未知有冇新措施，以及內房債務問題未解決，港股今年第一季仍難寄厚望。

不過港股經過超過9個月調整後，目前估值已處於極低水平，恒指市帳率(P/B)只有0.98倍，而不少股份股息率更具一定吸引力，加上政策監管對股市造成嘅估值壓力料可得到緩解。而內地經濟增長放緩下，內地有望微調放水，對股市應該係較為正面。 只係內地疫情反覆，再次對內地經濟帶嚟壓力，預期農曆新年消費旺季難以樂觀，但喺咁嘅情況下，穩增長政策或加碼，貨幣政策趨向寬鬆，料可對A股對嚟支持。至於港股暫時未見有明確催化劑，而喺疫情反覆下，中港通關進展亦未能明朗化，即管睇睇恒指會否仍受制20日線( 23457)，抑或可以企穩其上。若然恒指能企穩20日線，只要內地股市完成休假後向好，北水回歸或能帶動港股進一步挑戰24000水平。

古天后

(徐狄怡，證監會持牌人)