古天后日誌｜港股再考驗上月底部後或反彈

1月6日，大致天晴，氣溫有所回升，早上較為清涼。美國聯儲局嘅議息紀錄，令市場擔心或提早加息，甚至加息速度，拖累高估值嘅科技股全線插水，美股隔晚急跌，三大指數以全日低位收市。道指跌392點，報36407；標指跌92點，報4700；納指重挫逾3%，跌522點，報15100，創自去年2月以嚟最大單日跌幅，現價亦較高位回落約7%。

大型科技股受壓，聯儲局縮減買債速度或超過之前一輪縮表周期，雖然美股隔晚急跌，但仍有美股大好友，而過往預測美股表現準確嘅沃頓商學院金融學教授西格爾預料，即使聯儲局3月便加息，也無阻美股上行，差在全年回報或不及去年。佢解釋指加息雖推高借貸成本，對於短期利率在年底前升至逾兩厘並唔意外，但預期大市出現動盪後，中期將反彈，並直言投資股市係投資者抗通脹嘅唯一方法，其中高息股較吸引，因能提供強勁回報及抗通脹，相反科技股料受壓。而細摩亦表示今年美股升勢將持續，催化劑包括聯儲局唔會再更加鷹，而能源、汽車、酒店及餐飲等板塊可做好。

其實古天后對美股後市唔太悲觀，亦同意對抗通脹最好辧法，就係繼續投資股市，但短線震盪難免，尤其高估值嘅股份，面對息率趨升，難免受壓。至於港股經過噚日再次失守二萬三關後，隔晚喺ADR無乜方向，當然大家都等緊大市反彈，但喺市場欠缺信心，以及內地股市亦走弱下，港股無可奈何喺估值低迷下，仍難有起色。

恒指一浪低於一浪嘅弱勢暫未能逆轉，短線有機會再下試上月低位22665點，暫時22600關不容有失，否則就要再向下探底。不過暫時港股再向下大跌失守22600支持位機會唔大，主要係大市目前仍反覆，港股考驗22600支持後，有機會喺波幅收窄下，於保力加通道底部反彈。

古天后

(徐狄怡，證監會持牌人)