古天后日誌｜港股暫無方向 二萬四水平先作整固

1月18日，大致多雲，早上有一兩陣雨，天氣清涼。隔晚美股假期，港股無乜方向，周一港股係一場悶局，恒指連升四個星期後，暫時喺24000水平之上整固。呢個星期係歐美企業公布第四季業績嘅關鍵期，唔少大型銀行投行喺今個星期派成績表；而唔少重磅股，包括喺去年持續跑贏大市嘅增長股，業績能否交到功課，支持其升勢及較高嘅估值。

全球仍受變種病毒肆虐，中國內部經濟更受整改，及行業整合嘅後遺症所影響，目前內地經濟正面臨收縮，供給衝擊，以及預期轉弱嘅三重壓力，今年內地股市開局強差人意。睇返近日內地公布嘅經濟數據，上年第四季增長均創近年低位，唔少分析已因應相關數據而向下修訂增長預期。

仲有不足半個月就到農曆新年，但喺變種病毒影響下，內地仍堅持「清零」政策，人口跟貨物流動大受影響，節日消費氣氛大打折扣，只怕首季經濟無可避免會繼續尋底。市場正憧憬內地需要大舉放水救市，不過喺全球其他央行正進行收水，以避免通脹爆發之際，內地放水變得謹慎，至今內地當局並未有進行過激放水措施。

雖然中國上月規模以上工業增加值勝預期，但疫情下全球供應鏈正遭遇嚴峻考驗，內地堅持「清零」防疫政策亦受到外商批評。有分析指中國的嘅抗疫政策正是造成供應鏈斷裂問題持續嘅主因，並指相關風險喺未來數月，將對通脹及央行政策走向產生一定影響。

無奈內地似乎堅持「清零」，中國頻頻關閉重要港口和工廠等防疫手段，確實增加了斷鏈問題，並放大了持續嘅供應鏈壓力。尤其目前Omicorn傳染性之高，一旦回復正常生活，「清零」幾乎係不可能任務。即管睇睇內地會否適度調節防疫政策，若內地堅持「清零」政策，亦代表內地經濟復甦之路將更崎嶇，尤其是消費方面。而香港當然係跟住內地方向而行，同樣採取「清零」政策，若遲遲未能正常通關，中港兩地股市，今年上半年可能繼續跑輸全球，本地缸邊友無奈亦只有接受。

古天后

(徐狄怡，證監會持牌人)