俄仔Ansheles轉妖艷Look出碟做歌手嫌以前冇靈魂豁出去做自己

2022-01-27 09:00

2017年，俄羅斯型男Artem Ansheles憑住一口流利廣東話拍攝的《請阿媽飲涼茶》一片而爆紅，然後吸引ViuTV搵佢拍劇同做節目，不過18年拍畢好受歡迎的《返歸啦俄仔》後就冇再為ViuTV做主持，只曾於20年客串《地產仔》。

17年拍攝的《請阿媽飲涼茶》短片。

18年的《返歸啦俄仔》。

18年的劇集《迷失假期》。

其實自從打入香港市場後，俄仔Ansheles的工作以代言廣告為主，亦成立自家潮牌EARON，19年曾經推出首支廣東歌《麻麻哋Day》，原來俄仔內心深處最想做歌手，去年10月已推出英文單曲《Bunny》，12月再推另一英文單曲《Ignite》，兩首歌嘅MV已推出，曲詞加Styling由俄仔一手包辦。

現年27歲的俄仔將於2月2日年初二推出首張專輯《I’m Shell-less》，佢出PO表示，「好多人可以唔使自己寫歌唔使自己做埋visual，但我接受唔到。過去一年我每一日都埋頭苦幹創作關於呢張專輯嘅一切一切，希望可以造出令自己自豪的作品。由寫歌、音樂製作到專輯嘅一切視覺設計，呢張專輯完完全全反映咗我嘅理想與能力。我唔想成為一個平凡的，大衆化的藝人。所以我選擇獨立做呢張專輯。我認為藝術唔係在於你擺幾多錢落去，或者你從中賺到幾多錢。新世代嘅創作有新世代嘅方法，沉悶必須要被打破，久違嘅藝術娛樂應該要喺香港開花。我希望自己能獨立地做自己，讓大家重新看見不一樣嘅我。」

俄仔嘅首張專輯《I’m Shell-less》。

俄仔口中嘅不一樣包括形象，佢為咗重生，IG同YouTube都Delete晒舊片同舊相，IG嘅PO換嚟如JOJO Cosplay的妖艷新Look，不過佢嘅FB仲有Keep舊相。另外，佢又出咗段10分21秒，全英語嘅自問自答片去解構自己嘅轉變，當中透露自己嘅妖艷新Look其實係真正嘅自己，留意片尾，由製作訪問到美術等全部由俄仔包辦。

好有JoJo Cosplay Feel。

其實啲相幾靚。

俄仔選擇豁出去做自己。

玩自問自答解構形象突變及點解出碟。

自問自答片由製作到美術都由自己一手包辦。

問:點解突然唔做主持而嘗試做音樂?
答:唔突然，諗咗好耐，疫情令我反思自己嘅人生，唔滿意之前所做嘅一切，因為完全代表唔到自己，覺得冇靈魂，我有事好想分享，最簡單就係透過音樂表達，透過音樂可以完全展示真正嘅自己，以我想要嘅方式做自己。

問:你嘅風格及形象同以前好唔同。
答:呢個係我一直以嚟嘅樣，但我從來冇機會真正表達過，所以實際上冇改變，只係開始做自己，做我想做嘅事，其實內裡無變過。以前拍攝都會安排好晒我要着咩講咩做咩，而家我可以展現我想展現嘅嘢，講我想講嘅，做我想做嘅，成為我想成為嘅人，我就係想着成咁，其實無乜嘢大改變。

17年好陽光。

20年已經開始展露本質。

21年愈嚟愈妖。

問:製作一張專輯是一件非常複雜，艱難及昂貴的過程，為甚麼不選擇簽唱片公司而自己做?
答:首先好不幸嘅係冇唱片公司搵我，希望即將會發生，不過當你收取公司的資金去做音樂就會有一個責任，正如我提到，我想做自己，做我想做嘅事，作為一間音樂公司旗下歌手一定有限制。

問:你冇受過正規音樂教育及背景，但去做一張大型音樂專輯會唔會好困難?
答:呢個係一場惡夢，因為之前冇做過專輯，只出咗幾首單曲，唔可以同呢次比較，今次好多嘢都好陌生，咩係混音同mastering?以為自己可應付，發現好多嘢我唔識要去學習。但我唔可以從樂理開始學習，我實在冇呢種耐性，我盡我最大努力學習基本知識，學習一啲程序以便能夠作曲。首先製作咗我第一個DEMO，我至少可以同監製溝通，我想要咩方向，呢個過程中學習到好多嘢，好多嘢結合先可以成為一首歌。

問:MV入面嘅道具同服裝都係自己整，點解選擇自己做?
答:為拍《Ignite》呢首歌，着咗閃亮網狀水晶上衣，我買咗一塊布料，想用嚟做西裝，問裁縫做唔做到，對方一口拒絕話做唔到，我當時唔明點解做唔到，明明咁容易，所以就自己做。例如專輯封面嗰個貝殼，自己做嘅大貝殼，諗唔到有第二個人可以幫到我，所以我去嘗試，盡最大努力做，以確保絕對完美，最後做咗兩個月嘅貝殼掉咗去垃圾桶，而為拍MV做嗰件水晶衫，拍嘅時候已經爛咗。