朱智賢發冷又發熱快檢證無事去睇醫生遇意外淋雨導致出風癩

2022-02-21 18:00

朱智賢在社交網透露近日禍不單行，身體不舒服發冷發熱，先後做了兩次新冠快速測試結果呈陰性，因為第二日未退燒決定去看醫生，點知回家途中發生撞車小意外，在十度氣溫下，橫風橫雨落車搞了個多小時，她不單被淋濕凍到震，還出埋風癩。好彩第三日再做快速測試仍然是陰性，相信自己只是冷親，又提醒大家在非常時期，家中要有快速測試看門口，加上近日天氣寒冷多穿衣，不要病倒。

朱智賢近日病倒，她表示全身肌肉都好痛。

朱智賢提醒要買快速檢測包看門口。

朱智賢發燒都幾嚴重。

詳述不適經過的朱智賢留言：「第一天，一早瞓醒條腰好酸，冇乜為意，以為係前一晚拉筋拉得太狠所以有啲酸。然後到咗下午覺得個人好攰好攰，嘗試去瞓覺，喺被窩入面捲縮了1小時手腳還是很冰冷，凍到無法入睡。再過多陣，身體開始發熱，隨之而來就是全身肌肉酸痛，馬上食兩粒Panadol，做一次快速測試 - 結果negative。到了晚上成晚都瞓唔着，體溫一直在101以上，全身好熱好熱，踢開啲被又會發冷，全個身體啲肌肉都好痛，捵嚟捵去點都瞓唔到，就係咁過咗一個好辛苦嘅晚上。」

快測呈陰性。

換牌子檢測都無事。

朱智賢用三款來檢測，好安全。

朱智賢續道：「第二天，到了早上依然都係冇退燒，再做多次快速測試- 結果依然係negative！然後決定去睇醫生，睇完醫生打算返屋企好好休息，點知遇上小小的車輛碰撞，橫風橫雨又10度之下仲要落車搞咗個幾鐘，對鞋濕晒，頭髮又濕，風癩又出埋，凍到成個人震晒。第三天，燒已退，再做多一次快速測試，依然都係negative！所以大家不用擔心，我只係冷親。三次快速測試，分別用咗三隻不同牌子去測。所以話身體健康幾時都係最重要！喺呢啲非常時期，最好就唔好病啦！同埋奉勸大家屋企最好有快速測試劑守門口，如果唔係到你有少少唔舒服嘅時候你就會好騰雞。天氣凍，大家記得著多件衫。」