祝文君離世丨黃澤鋒去年12月藝進會活動最後一見文君消瘦出席冇提有病

2022-03-02 02:31

黃澤鋒跟祝文君同樣出身於藝員訓練班，認識多年合作無間，近年大家都成為藝進同學會委員而經常見面，所以前晚（2月28日）11時多收到文君死訊，感到相當愕然，「唉！真係諗都冇諗過文君走咗，大家幾十年朋友，早排仲見過佢嘅，因為我哋每年藝進同學會都會搞會慶，會慶係1230，即係12月30號，文君就係藝進同學會永遠名譽會長，嗰晚都有見到佢，佢仲同妃妃（澤鋒女兒）影相玩，佢幾鍾意妃妃，每次出席宴會，佢見到妃妃都會同佢影吓相，我同佢幾十年老友，大家都係訓練班出身，佢一出嚟我就識佢，我早過佢啲，由《城巿追擊》開始合作咗幾十年，藝進同學會又成日見，最後一次咪上次會慶囉！」

澤鋒跟文君都是應屆藝進同學會委員。

1992年，澤鋒和文君跟周潤發等藝進同學會成員，齊演出舞台劇《皮草店的春光》。

澤鋒透露去年12月底會慶見到文君，完全不覺對方有病在身，「我上次見佢都冇事，佢淨係瘦之嘛！冇諗過佢有肺癌，佢又乜都冇講，個樣又好開心，嘻嘻哈哈咁，都唔知佢有肺癌，後尾發生咗事，問過其他會長先知，佢係瞓覺走咗去，其實佢肺癌已經兩年，大家只係覺得佢瘦，唔覺得佢有病㗎！大家咁老友都冇講呢啲嘢，佢仲好後生嘛！」