獨家丨薛影儀戴好口罩派物資心情冇影響涉「起飛腳」被落案下周二提堂

2022-03-17 23:00

上周五中午12時，有讀者報料指影到「亞視一姐」薛影儀（阿儀）快步出入元朗警署，讀者形容當時阿儀神色凝重，身旁女子(應是經理人)則邊行邊講電話，兩人表現相當緊張。經《頭條日報》記者了解，原來阿儀因去年九月，冇戴口罩被街坊狙擊時，涉嫌「起飛腳」還擊一事惹上官非，被控普通襲擊罪，阿儀獲保釋候審，並於下周二（22號）上庭。採訪：方騫平攝影：葉君海、沈健程

上周五中午12時多，讀者影到阿儀跟經理人進入元朗警署。

阿儀行色匆匆。

阿儀快步進入警署，發現有人偷拍即擰轉面。

今年二月網上瘋傳一段阿儀喺去年九月，因冇戴口罩被元朗女街坊狙擊超過3分鐘的影片，最後阿儀衝入升降機，但被拍片者阻擋電梯門，阿儀遂出手兼「起飛腳」試圖趕走對方，並向大廈保安員求助，擾攘一輪阿儀才正確戴回口罩，片末可見有警員到場。據知，警方經搜證後正式落案控告薛影儀。前日(16日)下午三時，戴好口罩嘅阿儀，聯同亞姐冠軍陳美儀及「網絡人氣」大獎得主林海茵幫社福機構「絲打同行」派送物資畀南昌邨的低收入確診家庭。記者見阿儀較少發言，冇乜心機，而且被街坊狙擊事件後留下重大陰影，見到途人用手機遠遠影她即秒速轉身彈開，渾身不自在。

阿儀接受訪問期間見途人在偷影，即變驚弓之鳥。

被偷拍嘅阿儀好有陰影，秒速轉身話要走。

之前網上瘋傳阿儀被街坊狙擊片，阿儀為咗關𨋢門用腳掃開對方。

阿儀解釋當時疫情冇咁嚴重，才大膽唔戴口罩。

片尾有警員到場處理。

阿儀心情冇影響

記者就被控事件問阿儀回應，她秒回：「冇上庭，呢啲唔方便講。」在旁的經理人林寶玉承認有呢件事：「公司正解決中，𠵱家唔方便講。」問到係咪涉及上年九月冇戴口罩被街坊狙擊片有關？林寶玉坦言：「係，公司處理緊，有消息話你知。(會唔會庭外和解？)呢啲唔係我哋處理到嘅範疇，呢啲交返畀律師處理。」至於律師費問題，林寶玉指阿儀係公司藝人，有問題公司一定會幫手，目前阿儀工作及生活如常，一切OK。阿儀強調唔擔心惹上官非，心情亦都冇受影響，記者發現她身形略為消瘦，她解釋因為常做運動。

阿儀成個人瘦晒，眼神好落寞。

阿儀聯同亞姐冠軍陳美儀及林海茵幫社福機構派送物資畀低收入確診家庭。

阿儀雖然惹官非有啲煩，但依然抽時間行善。

坦言好憎被人偷影

問到是否被狙擊後變得敏感?她說：「冇冇冇(後遺症)…唔好問…問其他嘢…」但又坦言：「我好憎人偷影我，又唔係影得(我)靚，其他人畀人影都唔鍾意，都會嬲啦，𠵱家冇街坊再狙擊我。」天氣愈來愈熱，問阿儀係咪都會戴返好口罩？她說會：「咁𠵱家疫情咁嚴重，不過，我之前冇戴口罩都冇嘢，都係呈陰性。」林寶玉補充指阿儀𠵱家已經乖乖戴返好口罩，而且仲主動話要做善事，喺疫情下幫助有需要嘅人。