關宛珊囝囝跌傷下巴縫6針 醫院等候心亂到不停踱步
2022-03-17 22:15 
TVB女藝員關宛珊與林溥來（Patrick Sir）結婚7年，囝囝Preemo下月13日就1歲，估不到一家為防疫甚少外出，卻因囝囝受傷跌傷下巴，而要去醫院治療。媽咪關宛珊極之心痛，在社交網貼出多張囝囝的受傷照片，以及打上一大段文字交代事發經過。
關宛珊今日在社交網留言，表示前晚（15日）大約7時，在屋企大廳發生意外：「Preemo戴好頭盔喺木地板爬，爬爬下突然跣手仆親下巴落地，喊到收唔到聲，傷口好似唔深但顎起少少頭又好似好深，老公唔喺屋企返緊工，唯有我要保持冷靜自己幫BB仔止血，按住傷口止咗20分鐘左右，同時避開傷口用冰敷附近嘅位置，BB仔就冇再喊仲笑住玩添……大約8:30老公返到嚟，睇到傷口好大話肯定要聯針，嗰一刻當我聽到Preemo要聯針嘅時候，已經喊咗岀嚟，因為咁細個BB做手術實掙扎得犀利，醫生通常建議全身麻醉……老公跟住建議我先帶BB仔入房瞓覺，岀到嚟佢原來已經打咗好多電話，當中知道原來兒童醫院唔收急症，仲特登搵咗啲資料俾我睇安撫我，知道有機會唔使全身麻醉。同時佢搵咗我哋嘅兒科醫生，佢即時介紹咗另一位兒童外科醫生俾我哋，醫生睇完相同片，話傷口好深一定要聯針，但係好彩係佢話試吓局部麻醉加安排幾個護士撳住BB聯針，亦都預告我哋要狠心忍痛。」
到晚上約10時，Preemo已入睡，二人就帶他到私家醫院，但疫情關係，父母不能陪入急症室，關宛珊續道：「所以我哋同Preemo講『一陣入去忍住痛，啪啪兩下就岀返嚟㗎喇，唔使驚㗎～』老公放低得11個月大嘅Preemo喺治療室床上就要離開，4個姑娘撳住BB仔嘅頭、手、腳，用塊布遮實BB仔個樣，喺外面我哋聽到嘅係佢前所未有嘅喊聲，係好驚多過痛嘅大喊聲，真係好心痛！但係喊喊吓冇咗聲嗰吓係仲驚！喊吓停吓，心亂到不停踱步。突然姑娘叫『爸爸入一入嚟』，真係嚇到命都冇！原來只係睇睇聯好嘅傷口～姑娘們同醫生都話Preemo算好乖好配合，聯咗6針都唔算掙扎得好勁，係唔鍾意俾人撳實佢個頭啫～Haha～大約深夜12:30返到屋企，同佢換衫換片再俾支細奶佢飲就即刻瞓咗添。」
經過今次意外，關宛珊自言囝囝比她想像中堅強和勇敢，除了感謝兩位兒科醫生在最短時間內給予建議及幫助外，她更不忘給同為父母的網民一些溫馨提示，因疫情最好自備快速測試劑，否則就會如她一樣要即時去附近購買，兼為BB檢測完才可以入治療室，她更提醒幫BB買保險是很重要。
更多第5波疫情資訊，請到以下專頁瀏覽（按此）
立即下載｜全新《星島頭條》APP：https://bit.ly/3yLrgYZ
最新回應