導演陳詠燊要捍衛戲院陳湛文爆資深演員P先生滿身酒氣開工

2022-03-19 10:00

電影《飯戲攻心》導演陳詠燊和演員陳湛文最近為林柏希網上節目《月傾會》做嘉賓，由黃子華、鄧麗欣主演的《飯戲攻心》原為賀歲檔，戲院因疫情被逼停開，現上映無期，陳詠燊堅持不會放在其他平台上映：「我哋好想捍衛返戲院，覺得戲院係一個文化嘅殿堂！」而憑《IT狗》男B一角大受歡迎的陳湛文，初嘗爆紅滋味有何感覺？「我會話係有少少守得雲開！因為經歷過《三夫》我又唔會期望太大，我本來真係覺得你哋都應該唔記得我㗎啦！」

在「大膽答冇膽食」環節，林柏希預備夠晒殺菌的大蒜和指天椒，導演陳詠燊被問合作藝人中邊個最好？導演秒答：「子華，一來我係好愛佢啦，佢係我偶像；第二係成個合作過程個默契，好到我前所未有咁好呀！」至於最難頂，「唔開名啦，編劇年代，我嗰陣時拍好多愛情喜劇，好多係年輕偶像，其中有一個，同佢傾戲嘅時候掛住玩啦，拍完又喺度扮晒嘢，其實喺嗰班好紅嘅年輕偶像嚟講，佢係最唔紅嗰個！」男星定女星？導演露是男明星：「佢依家偶爾會有一啲新聞㗎，但係都唔會點樣出現㗎喇！」但堅持不開名，導演被罰食！

電影《飯戲攻心》導演陳詠燊（左）和演員陳湛文（右）一齊受訪。

陳詠燊話子華係最好，但就唔肯開名講邊位演員最難頂。

輪到問陳湛文，他爆曾經遇上一個資深男演員，「嗰個難受唔係對我侮辱，而係覺得佢唔尊重演員呢一份工作，因為佢埋親位都飲到成身酒氣，台詞又唔記得，仲要導演叫佢唔好咁做，佢呢頭話好、冇問題，嗰頭又做返！」陳湛文開估呢一個係P字頭男星，「佢本身來自電影，仲要係資深㗎！」如果再拍《三夫》，陳湛文就希望找廖子妤演出，認為她演情慾戲亦能手到拿來。

到兩位嘉賓互問，陳湛文不敢答陳果，還是鄭保瑞導演較好；而陳詠燊亦不敢開名講邊個導演屬低檔次，但就直言好憎偽善的戲，「嗰條片係一條噱頭片，本土笑片、噱頭戲，總之成班後生仔唔知做啲乜，跟住佢最尾夾硬兜嗰種咩熱血呀，同某一個歷史年代嘅一啲Hero溝埋一齊。我就覺得，你有冇偽善到咁呀！」節目尾聲，兩位人夫兼人爸各自講了一番感人說話，陳詠燊直言：「講個仔會喊㗎喎！」