古天后日誌｜內房雖然捱過最差時間 選股方面仍有局限

3月29日，大致多雲，有幾陣驟雨，稍後局部地區有狂風雷暴。本周美國將會有唔少經濟數據同埋就業數據公布，美股隔晚上升，道指升94點；標指升32點；納指則升185點。聯儲局多位官員近期相繼放鷹，市場亦紛紛調高加息預測。通脹升至40年高位、商品價格高企，以及對俄制裁對全球經濟增長威脅等風險下，美國大型股票成為投資避風港。大型股票傾向有能力維持盈利增長，對投資者而言更為可靠。而分析指標指成分企股每股盈利增長已連升3周，供應鏈風險及企業收入預期正持續改善。而大型企業財政狀況更為穩健，現金流強勁，亦相繼加碼回購，相對其他股份，大型股似乎更為可靠。

至於港股方面，京東(09618)噚日明顯跑輸其他重磅科技股，主要係騰訊(00700)上周完成向股東分發京東股份作為特別股息，而因為京東本身並非港股通可買賣股份，因此北水只能透過港股通沽出手上股份，但不准買入，形成北水淨估出合共17.98億元京東股份。預計當北水呢批股份完成沽貨後，京東可以扭轉短暫弱勢，回復跑贏其他科技股甚至跑贏大市嘅走勢。

至於融創中國(01918) 剛發通告，指將無法如期公佈業績，並預告本周五起停牌，預期今日股價定必受壓。雖然融創在3月17日大市急速反彈之際，股價一度急升至6元水平之上，但公司嘅財務問題並唔會因為股價回升而解決，股價再度回落亦係必然之事。融創未能如期公布業績，好大機會係盤數到家下都計唔掂，公司去年年底多次出售資產套現，加上兩次低價配股，本以為公司應有足夠資金應付到期債務，豈料上週40億元債券到期，都無法還息還本，即係公司仲有唔少表外負債隱藏，呢啲數要點交代，只有等公司砌好盤數公布業績先有答案。之前古天后講過，內房股最差嘅時間係過咗，不過要揀內房股入手，都只限一啲財務狀況較穩健嘅公司，而融創並不屬此列，就算月中反彈有幾強勁，都只不過係曇花一現。

俄烏戰爭仍然膠著，市場已消化戰爭消息，對股市嘅影響亦逐步治退。不過市場擔心明年全球經濟可能出現衰退，油價實難長時間喺高達110美元高位支撐落去，資金開始流出商品市場，過去一個月被捧到上天嘅商品價格，小心隨時出現回吐，相關股份好睇住食胡。

古天后

(徐狄怡，證監會持牌人)