古天后日誌｜阿爺預告降準 但對中港股市僅能帶嚟短暫支持

4月14日，大致天晴，日間炎熱及乾燥。隔晚美股反彈，三大指數做好，道指升344點；標指升49點；納指升272點。美債息略為回落，帶動美股向上，不過一如噚日所講，納指波幅每日擴大至2%，難免令保守投資者步。雖然美股暫時似短期見底，但資金願唔願意繼續追貨又係另一回事。目前美股正值業績期，公布業績後美企個別發展，但唔少企業反映季度增幅速度減慢，美股吸引力已今非昔比。

「新債王」警告災難將降臨

有「新債王」之稱嘅雙線資本(DoubleLine)行政總裁岡拉克警告，一場「災難」或將降臨，好可能明年出現。當美國兩年期及10年期國債孳息率「倒掛」，意味「麻煩將至」，歷史上被視為衰退警號，目前股市格局與1999年第四季「非常相似」，當時正正係互聯網泡沫爆破前嘅情況。

岡拉克續指，標指過去受惠美國聯儲局量化寬鬆及低利率政策，但依家更睇好美股以外市場，預期歐股將跑贏美股，尤其在經濟衰退來臨時。佢估計，工資跟租金增長將引領通脹今年上升，通脹水平將會喺今年回落但維持較高水平。

阿爺又出招救市，國常會開腔要降準救市，過往國常會發聲後，人行通常喺一個星期內會有所行動，唔排除喺周末期間，即係我哋放緊復活節長期內進行。睇返內房企業嘅債務問題，已蒸發財富超過50萬億人仔，仲要唔要民企喺上月出現債務違約，市場資金鏈幾乎盡斷。仲要加埋呢排疫情惡化，深圳、上海跟廣州等一線城市先後封城，內地經濟雪上加霜。阿爺今次就算降準1%，向市場投放過萬億元貸款，相對已蒸發嘅幾十萬億元資金，相對微不足道。

3月底阿爺已放風減息，市場認為A股出現政策底，創A一度單日升過4%，但其後往後又回復級級落形態。過往內地減息降準A股都唔係例升，好多時公布嗰下A股彈一彈，消失公佈後一兩日有反彈，甚至即日出現走勢逆轉形態，其後又回復弱勢，說穿了降準減息係因為經濟太差，有陷入衰退嘅危機，呢個先係降準減息效應難以支持股市持續向上。更何況目前通脹高企，可能人行只能降準去略鬆銀根，減息似乎礙於條件未能實現。

古天后

(徐狄怡，證監會持牌人)