古天后日誌｜人民幣走弱防資金外流

4月19日，多雲，有一兩陣驟雨，天氣較為清涼。美國通脹情況惡化，令市場憂慮加息速度跟幅度加大，10年期美國國債孳息率隔晚高見2.88厘，創2018年12月以來新高。美股隔晚表現反覆，道指跌39點；標指跟納指分別跌1點及18點。聯儲局再有官員放鷹，美國聖路易斯聯儲銀行行長布拉德周一表示，唔排除聯儲局一次加息0.75厘嘅可能性。除咗美股本身表現反覆，中概股表現亦強差人意，滴滴股價盤中一度跌三成，因為其退市方式打擊投資者信心，同時其季度虧損較去年同期擴大近1倍。

除咗債息向上之外，俄烏局勢再度升溫，刺激國際油價周一上揚。紐約5月期油收報每桶108.21美元，升1.26美元或1.18%，延續上周逾8.8%嘅升幅；布蘭特6月期油收報每桶113.16美元，升1.46美元或1.31%，延續上周約8.7%嘅升勢。

人行只能有限度放水

雖然人行於上周五香港放復活節假時公布下調準備金0.25厘，以及噚日內地公布首季GDP仍錄得4.8%增長，但市場似乎唔多收貨，噚日內地股市偏軟，主要係降準0.25厘低於市場降準0.5厘嘅預期，加上內地近日多個城市因為疫情惡化而進行局部封城，而一線城市上海封城更已近月，嚴重打擊投資氣氛。

唔少人以為今次內地降準點都會有0.5厘，但喺美國收水嘅情況下，資金回流美國，中美息率更出現倒掛，加快資金從中國流出，人民幣再無優勢。但喺疫情影響下，內地為求穩住經濟，不得不略為放鬆銀根，可惜又擔心一旦減息令資金加快外流，兩難局面下，唯有象徵式降準0.25厘，處境可以話尷尬之極。

除咗降準幅度不似預期之外，內地監管機構對科網股監管未見鬆懈，上海因應肺炎疫情持續封城。上海市監局喺官方社交平台發文表示，為進一步加強疫情防控期間，電子商務平台合規經營，日前召開大型電商企業網上行政約談會，包括阿里巴巴(09988)旗下外賣平台餓了麼，以及美團(03690)在內嘅12家涉及民生領域嘅電商企業，針對天價農產品、盲盒等問題，要求加強對平台內經營者管理力度。預計今日美團跟阿里難逃一跌，呢兩隻重磅指數股下跌，無論恒科指或者恒指都無運行，睇嚟恒指21000大關未必守得住，加上牛證重貨區喺20500大把肥牛等住劏，睇嚟假後港股又要向下尋找支持。估計恒指首個支持位喺20900點，跟住就係20700及20500點兩個位，即管睇睇劏完呢堆肥牛，大市能否站得住腳。

古天后

(徐狄怡，證監會持牌人)