獨家丨鄭希怡驚覺豆豉鯪魚炒油麥菜係極品上海封城羅霖為搵食下月再返去

2022-04-30 07:00

上海3月尾開始封城，溫碧霞見勢色唔對，隔離出關後馬上轉往三亞度假，成功喺封城前甩身；往上海做美容代言及直播嘅羅霖就慘被圍困封控小區，20多日足不出戶，當時解封無期，極度擔心冇得食！一家3口已移居當地嘅鄭希怡(Yumiko)就隨遇而安，形容封城令兩母女上咗好好嘅一課，仲因此發現豆豉鯪魚炒油麥菜原來好好食。採訪：方騫平

鄭希怡和7歲梁浸浸喺疫情下上咗寶貴嘅一課。

羅霖近年多往內地工作，包括到上海出任美容代言人。

溫碧霞在上海酒店做運動。

上海新冠肺炎疫情持續，當地分成封控區、管控區和防範區嚟管控。以封控區最嚴格，喺7天封閉管理期間足不出戶、服務上門，直至喺「7天封閉管理+7天居家健康監測」內冇新增陽性個案就可解除封控。居於封控區嘅羅霖，因為小區不斷有呈陽而增加封控期，雖然預計本月30日才解封，但她已急不及待向小區居委會申請「出門証」，預先訂好機票及申請「回港易」，兼且預約做核酸及有「通行証」司機，喺4月21日晚已成功回港。

羅霖焗住買貴價物資

羅霖坦言初時都幾徬徨：「只係預咗一個禮拜嘅糧食，平時喺出面食嘢，冇諗過要自己煮，住所只有兩個好細嘅奶煲，所以擔心到朝朝上網搶購食物，但都搶唔到，好彩媽咪聯絡到上海啲親戚幫手買，另外，朋友介紹咗『跑腿』幫我買紙巾、洗衣液等，但佢收我$300(人民幣)『跑腿費』，原先只係200幾蚊嘅日用品漲價到500幾蚊，加埋『跑腿費』共花900幾蚊。」另外都有團購蔬菜及日用品，不過，就以「盲盒」形式隨機取貨：「但我覺得團購啲嘢唔係咁新鮮，見鄰居有以物換物，好似返到原始時代咁。」

羅霖喺封控第6日收到管理員送上門嘅食物，感覺好溫暖。

政府送上生油等特資，一人份都幾豐富。

羅霖獲親友送嚟大量物資。

得個細奶煲用嚟煲飯。

大失預算嘅羅霖壓力大增：「有抗疫疲勞，擔心工作又會取消，收入大減點維持生計？不過為咗搵食，一個月後她會再返上海：「冇辦法，內地工作機會一定比香港多，我只係盡力做好一位母親嘅本份去照顧3個兒子，仲有我媽媽，有工作就好感恩，只求一個月後疫情會減退。」

羅霖有5個月沒有見兩個兒子及愛犬。

Yumiko鄰里關係好咗

鄭希怡就隨遇而安：「已留喺屋企一個月，𠵱家清心寡慾，只要屋企夠就ok！𠵱家每餐兩三個餸，每次都食到清晒，一粒飯都唔嘥，疫情下學到所有嘢都唔可以浪費，會更加珍惜。平時好少食罐頭，收到罐豆豉鯪魚，咁啱政府派咗啲油麥菜，哈！原來豆豉鯪魚炒油麥菜仲好食過大餐。」

鄭希怡首次覺得豆豉鯪魚油炒麥菜原來仲好食過大餐。

平日最多煮個餸。

因為煮得多，鄭希怡嘅廚藝愈嚟愈好，另外每餐都食清光，一件不留。

她又用正面態度睇封城：「你可以覺得自己好慘，困住咗冇得出去，但我覺得人間有情囉。呢段時間，我同屋企人24小時相處，陪個女做功課、彈琴，佢原本好唔鍾意彈琴，𠵱家早晚練琴，我覺得好有成功感。另外，同鄰居關係好咗，試過因為冇生抽，用辣椒醬同鄰居換物，有次冇米喺群組求救，有鄰居話有多唔使換嘢，患難見真情。我見保安朝晚運送物資畀住客好攰，𠵱家我煲水飲，唔敢再叫樽裝水嚟加重佢哋嘅工作負擔。囡囡梁浸浸都好生性，乖咗好多，雖然只係切零食蛋糕仔賀7歲生日，但都好開心。」