古天后日誌｜短線反彈持續 成交薄弱大戶仍可上下其手

5月17日，大致天晴，日間朝燥，氣溫適中。美股隔晚個別發展，道指升26點，但標指跟納指分別跌15點及142點。科技股無疑已進入熊市，納指連12000點都未能企穩，而標指則陷於熊市邊沿，相前喺4000點爭持。唔少大行分析都認為美股目前只係處於熊市反彈之中，仍要向下尋底，美股稍後可能有更大跌幅。雖然美近日反彈，但股債資金仍見流出，其中，美國債券基金按周走資規模更倍增，股債資金分別連續18周及3周錄得流出。
 
上周跨資產市場急劇波動，除咗股債均見沽壓之外，虛幣市場暴瀉亦加重資金外流，不過美國10年期債息衝上近3.2厘即急急回落，重返3厘之下，某程度上反映長達近5個月嘅債券動盪期或接近尾聲。至於美股見底未，暫時情未唔算樂觀，雖然唔少中小型股份已較高位大幅回落，但大型股跌幅未算過份，通常股市見底最後下跌嘅，就係最有實力嘅大型股份，當中蘋果公司(Apple Inc.)係指標之一，其跌價自年初至今幅唔夠兩成，連100日線都未見過。

而美股見底另一個指標，係信貸市場大幅動盪，甚至出現失靈，再出現一次大調整，熊市先可以終結。雖然今年美股跟債市見波動，但企業債市相對平靜，相關債券息差仍處於遠低過以往波動期水平。不過美國經濟目前有機會陷入滯脹，即管睇睇稍後企業債市會否出現動盪，令美股出現終極一跌。

至於港股，上周趁外圍震盪，急回至19200水平，又殺咗一批重牛之後，外圍回穩，港股亦展開短期反彈。本來就預計5月份係上落市格局，暫時恒指見咗19200後，呢一輪反彈先以10日線及20日線為目標，今日能企穩10日線(20176)，及20日線(20385)，下一目標當然係50日線(20998)，只不過大市始終未見資金流入，成交唔配合，反彈動力亦受限制，上到20800-21000，又到熊證重貨區，殺完一堆熊證，反彈可能又要告一段落。總之目前只能步步為營，港股轉勢仍言之尚早。