軒仔獲馮允謙送紙製門票百無禁忌謝霆鋒百忙抽空睇騷支持好友

2022-05-18 17:30

張敬軒補場紅館騷昨晚（17日）進入第6場，除了謝霆鋒現身睇騷之外，馮允謙（Jay）則上台擔任嘉賓。由於Jay是「鬼仔」不懂中文，因此兩人合唱《他的故事》時，提詞機打出一串由他自行拼音的英文歌詞，夾雜廣東話及英文拼音，只有Jay自己才看得懂，十分搞笑，軒仔鬼馬問道：「點解今晚提詞機會出一串越南文？我望埋去唔知係乜？」然後更叫Jay讀出來給觀眾聽，引全場爆笑。

軒仔大讚Jay（右）的聲線。

Jay搞笑送上自製的演唱會門票給軒仔。

軒仔讚Jay一直給他謙厚、謙卑、笑容陽光的感覺，對方的聲線在樂壇中更是自己最喜愛，還透露以前曾需要人出手幫忙監製、錄音時，Jay都二話不說趕到協助，兩肋插刀，是難得的好朋友。Jay亦非常有心地自製自己即將在7月舉行的演唱會門票送給軒仔，只因真的門票尚未印好，軒仔聞言取笑說：「依家啲後輩，點解咁鍾意整啲紙製品畀長輩！仲要係7月！算啦，佢係鬼仔，佢唔識呢啲嘢，好多謝你，你演唱會我一定會嚟！」軒仔開騷一星期，場場當尾場演出，昨晚又再破紀錄，一共「安歌」了5次。此外，由於防疫措施於明晚（19日）開始進一步放寬，大會再次努力向紅館爭取，最終明天再一次可以把限量最後8場門票公開發售，歌迷可以把握最後機會！