獨家丨郭玥彤搬獨立屋創造3千呎兒童樂園𡃁模靚媽疫情冇得帶囡囡出街玩

2022-05-25 07:00

35歲郭玥彤（前名郭穎兒，Celia K.）2010年以𡃁模身份出道，出過寫真拍過電影，2016年跟生意人李冠鋒結婚並淡出幕前，先後誕下3個女兒。早前她先後亮相ViuTV《媽咪Kingdom》及TVB《360秒人生課堂》節目，分享由𡃁模變成3女之母的心路歷程。凡事以三女為先的Celia K.將3千多呎獨立屋，變為兒童樂園，雖然全屋被玩具同小朋友物品侵佔，但可以跟囡囡一齊成長，Celia K.坦言目前的生活相當開心。

採訪：杜杜攝影：沈健程

Celia K.話平日3個囡囡最愛黐住爸爸，連食嘢都要坐住大髀，造就這次影全家福機會。

2012年，Celia K.以𡃁模身份，推出首本寫真集《Missing Celia K.》。

2016年，Celia K.跟生意人李冠鋒結婚，並淡出幕前。

節目播出後，有網民留言鼓勵Celia K.，「最感動有網民話，『你可以將一啲我哋認為好難堪嘅嘢，用幽默方式表露，你真係冇所謂去分享，真係好值得鼓勵』，諗返係有啲難堪，但題目係用𡃁模嘅人生階段去講，冇後悔嘅，中間有少少唔開心同迷惘，但如果可以影響到一啲同路嘅媽媽，都係做咗件好事。」

早前Celia K. 獲好友Bob邀請參加《360秒人生課堂》，老公都有現身支持。

學識享受做阿媽

Celia K.婚後6年來不斷經歷懷孕、生BB和湊BB過程，她承認過程很迷失，「以前做𡃁模，會有導演教你，有人從旁協助你，或者你可以睇其他人攞經驗，但係做媽媽要自己汲取經驗，中間有段時間唔知自己做緊咩，長期瞓、食、生、湊咁樣，好迷惘，冇晒目標，覺得一世就係咁。」

Celia K.是3女之母，包括5歲長女李明芯、3歲次女李明珈及1歲幼女李明臻。

Celia K.跟丈夫位於2樓的主人房，已算全屋唯一沒有小朋友物品的地方。

不過Celia K.見到老公湊小朋友好快上手，亦學識享受跟小朋友一齊成長，她亦開始學習，搵到做媽咪樂趣，亦從囡囡學識某樣嘢獲取成功感。「以前喺工作上有成功感，𠵱家可能係同佢哋相處，或者教曉佢哋某啲待人處事。」現在Celia K.凡事都以3個女行先，shopping亦是，「買佢哋啲嘢買得最開心，去旅行第一時間搵大型嘅連鎖嬰兒同幼童嘅舖頭，爆買幾篋返嚟，換嘅現金第二日就冇晒，冇自己份已經成為習慣。」

1樓是小朋友睡房，以及主要玩樂空間。

1樓的玩樂空間，設有兩個囡囡最愛的波波池。

開頻道拉近關係

疫情下，Celia K.與丈夫為小朋友搬到屯門3千呎獨立屋居住，「疫情第一波我哋住喺一個屋苑嘅頂樓，因為要搭𨋢，每日要經過50幾樓會好危險，加上佢哋冇乜活動空間，日日困喺屋企就好癲，先生就提議物色一間屋仔，可以擺到我哋咁多人，又可以有啲空間畀佢哋游水、踩單車，跑吓，撞啱見到呢度。」

Celia K.的麻雀房，亦被囡囡的鋼琴所霸佔。

Celia K.屋企唔多擺設，最多也是一家人的照片。

由於小朋友愛畫牆，所以新屋入伙前Celia K.冇特別裝修，預留更多空間給女兒，「只係擺啲生活必需品，其他全部係佢哋啲嘢，每層都有張牀，地下又有啲書，等佢哋唔使行嚟行去，本身預個廳唔擺玩具，佢哋都會攞落嚟，1樓預畀佢哋做玩樂空間，有日老公話不如擺個波波池喺度，再有滑梯等等，愈加愈多佢哋喜歡嘅嘢。」本來老公安排了一間麻雀房及天台按摩池讓Celia K.跟朋友聚會，但最後多了個鋼琴及沙池，逐漸被囡囡物品侵佔，Celia K.笑言都已經習慣，冇乜所謂。