軒仔豪氣請岑寧兒免費用錄音室藍奕邦炮製愛心靚湯滋潤好友

2022-05-26 23:00

張敬軒紅館補場演唱會今星期來到尾聲，昨晚（25日）第12場軒仔請來岑寧兒（YoYo）及藍奕邦任嘉賓。軒仔跟YoYo合唱一曲《黃色大門》，YoYo表示：「我去你錄音室錄歌多過見你本人，我想送份無形禮物畀你，好多謝你堅持疫情下開呢個騷，因為『相聚』係一份好好嘅禮物，我送個擁抱俾你。」而軒仔亦向YoYo送上回禮：「我都想送番份無形禮物畀你，只要一日仲喺我錄音室錄歌，我贊助你所有錄音！」YoYo即時開心到「擘大口得個窿」，十分可愛。

至於「安歌」時段，軒仔請來藍奕邦任嘉賓一同合唱《你倫敦我紐約》，唱畢藍奕邦表示：「8年冇上過紅館台，今晚係我入行以嚟第一次做演唱會嘉賓，仲要係四面台。」軒仔即笑說：「多謝邦邦俾咗第一次我。」此外，藍奕邦原來昨晚帶了親自煲的湯，一心帶上台送給軒仔，怎料卻忘記，最後惟有等完騷後在後台補送給軒仔。

軒仔豪氣贊助YoYo錄音，她聞言十分驚喜。

岑寧兒唱功出色，經常為歌手做和音。

軒仔和藍奕邦（左）相識於微時。

藍奕邦在後台向軒仔補送愛心靚湯。

此外，之前第11場則請來樂隊ToNick任嘉賓，ToNick見軒仔近期榮升做導演，有心訂造一張寫著「HINS CHEUNG」的導演椅送給他，除了祝他繼續有好作品，主音恆仔還笑說：「你拍多啲好作品，可以搵我做演員。」軒仔與ToNick合唱《時間的初衷》，唱到尾時他聲嘶力竭，唱畢軒仔笑說：「呢個年紀先覺得自己有rock n roll基因散發出嚟……我儲儲埋埋，喺屋企食早餐啲唔開心，啱啱一次過散發晒出嚟。」