趙希洛天台戲喊足4個半鐘 27歲鄧卓殷靠空氣劉海演活14歲學生妹

2022-06-04 13:30

TVB新劇《十八年後的終極告白2.0》自開播後，焦點一直集中在三位女主角-譚凱琪、龔嘉欣及趙希洛（Candice）身上，飾演宋慧琪（Joyce）的Candice因為連環遭受小產打擊，留院期間哭了又哭，先是對著老公Jason（陳山聰飾）欲哭無淚兼自責的問道：「BB明明陀得好地地，點解突然之間冇咗…係咪我做得唔好…」再來情緒Level Up，掛著兩大行淚水走上醫院天台企跳：「我真係接受唔到呀！我發夢仲見到我哋個BB，佢喊得好慘，好想抱佢，但我抱唔到佢…」。

連環小產，真係女人最痛！

最終都係難抵喪子之痛，打算企跳了結生命。

Candice呢個「欲哭無淚」Mode，比悲傷更悲傷。

與老公Jason（陳山聰飾）相擁痛哭。

不少網民對於Candice天台喊戲直呼印象深刻，大讚演繹有層次。Candice及後在社交網上載拍攝花絮照，並透露原來為了該場戲喊足4.5小時！Candice事後受訪時坦言兩場喊戲均做足功課，與教戲老師討論了不少細節位：「每一種痛嘅演繹方法都有好大分別，好感恩大家有留意到。每場喊戲我都分咗唔同嘅程度，因為每個人就算經歷同一件事，未必每次嘅哀傷都係一樣。

由於Candice的「癲婆」演出太深入民心，網民期待她再登「癲」峯，對此監製王偉仁笑言Candice該兩集演出只是「小菜一碟」，隨著劇情發展她將延續「瘋狂的血」，帶給觀眾前所未有的官能刺激：「大家應該從來冇見過咁嘅趙希洛。」

Candice拍呢場戲喊足4個半鐘，認真辛苦。

譚凱琪個眼神，好似充滿不甘咁。

難忘龔嘉欣奇招谷眼淚

昨晚（3日）一集亦有新角色登場，便是飾演龔嘉欣14歲妹妹沈曉彤的鄧卓殷（Amber）。雖然Amber已年屆27歲，飾演真實年齡相差13年的學生妹卻零違和，Amber受訪時分享扮演學生妹心得：「會觀察表妹平時嘅舉動同埋語氣，第二睇完劇本後唔好諗得太複雜，因為小朋友比較直率。」另外又分享三大貼士，就是空氣劉海配鬢辮以及校服，Amber笑言：「著住校服之後即刻覺得自己係學生，好幫到入戲！」Amber又謂難忘龔嘉欣對她的照顧：「有一場情感戲，嘉欣捉住我對手講番我哋戲入面嘅處境，即刻幫到我入戲，啲眼淚衝出嚟，好感謝有佢。」