古天后日誌｜港股隨外圍急回 20及50日線不容有失

6月13日，大致多雲，日間部份時間有陽光炎熱，間中有一兩陣驟雨。上周五美股顯著下跌，道指跌880點；標指跌116點；納指更跌逾3%或414點。美股上周五急挫原因，主要係5月份CPI再創8.6%新高，較早前市場預期通脹見頂期望落空，美聯儲局難以於短期內停止加息，甚至已有預期6月議息一如預期加半厘後，7月加息0.75厘預期已升溫。本來市場認為10年債息升至3厘左右見頂，但上周五10債息已高企於3.17%，一旦通脹持續高企，甚至進一步攀升，美國債息高居不下，對美股嚟講當然並非好事。

英日央行本周議息

市場再度憂慮聯儲局進一步收緊貨幣政策，今個星期將會係美聯儲局議息大日子，喺5月份CPI爆升後，聯儲局立場會否進一步轉鷹，要睇埋主席鮑爺嘅講話。除咗聯儲局之外，英倫銀行及日本央行亦會於本周公布利率決定，而歐洲央行拉加德亦會發表講話。美國嘅CPI上周五成為引爆美股嘅藥引，今個星期嘅零售銷售數據勢必成為焦點，預期外圍股市更趨波動。零售數據公布前，上周五已公布美國6月初密歇根大學消費者信心指數，降至1940年代末調查開始以來嘅最低水平，印證咗通脹高企損害消費意欲嘅講法。專家預計，消費信心短期內仍會偏軟。

對於早前美聯儲局不停強調高通脹只係暫時性，並於3月份時指通脹已見頂，美國前財長薩默斯大表不滿，甚至狠批聯儲局，指該局在3月時對通脹嘅預測非常荒謬。於3月時，聯儲局預測通脹會喺今年底降至2%水平，並料通脹會見頂回落。對此，薩默斯直言聯儲局一直未有承認自己犯錯，也未有意識到此番言論對其信譽構成損害，稱「通脹見頂論」，就好似「暫時論」一樣，顯然都係錯誤預測。薩默斯認為，目前聯儲局作出大幅度加息係適當，但採取行動與實際見效會有一定時間差，而該局喺收緊貨幣政策上嘅延誤，已經產生咗實際損害。

港股今日隨美股低開係無可避免，雖然阿爺不時出招及出口術欲穩定中港兩地股市，但美股呢隻全球股市領頭羊跌到一仆一碌，中港股市又豈能獨善其身，預期10日線21494失守後，或成阻力，而短線有機會考驗20日(20926)及50日(20960)匯聚區，一旦失守，大市重返20000邊機會大增，不得不防。

古天后

(徐狄怡，證監會持牌人)