古天后日誌｜美陷滯漲機會大增 聯儲局陷兩難局面

6月16日，大致多雲，間中有驟雨及幾陣雷暴。美股隔晚表現反覆，先跌後反彈，美國聯儲局宣布加息75點子，加幅為自1994年以來最大，該局主席鮑威爾暗示7月可能加息50點子或75點子，同時承諾會決心讓通脹率回落至2%。有關消息消除部分市場不確定性，帶動美股反彈，道指升303點；標指跟納指分別反彈54點及270點。

美股喺議息公布後先跌後彈，主要係鮑爺又出嚟安撫市場情緒，佢話加息0.75厘唔係一個常態，提及7月未必會一定加息0.75%，仍有機會加息0.5%，美股就拗腰回升。事實上，美聯儲政策年底前會再多加1.75%，從美聯儲OIS掉期顯示，7月將加息0.75%，7月和9月合共加息大約140個基點。

有華爾街「新債王」之稱嘅雙線資本(Doubleline Capital)創辦人岡拉克(Jeffrey Gundlach)認為，鮑威爾睇法短視，預期今年底通脹率可能高達6%，故認為聯儲局應依家就要加息至3厘，以抑制通脹。事實上，美債息仍然高企，而聯儲局已調低美國經濟預測，由3月時預估有2.8%，現在降至只有1.7%，GDP大跌1.1%，明年預估再調低0.5%至1.7%，要到2024年才有望回升至1.9%。美國GDP降至只有1.7%，美聯儲預期未來3年PCE通脹分別是5.2%、2.6%及2.2%。即係未來兩年美國要面對低增長嘅同時，又要硬食高通脹，出現滯脹可能性大增，美聯儲局目前做法只係希望就到軟著陸。

不過「新債王」就唔認同聯儲局目前做法，認為美國經濟可能比市場預期更為脆弱，美國更有機會陷入衰退，預期聯儲局恐難讓經濟實現軟着陸。事實上，美國按揭利率在聯儲局加息前夕已經急升，30年期房貸固定利率平均值周一起已衝破6厘，為2008年以來首次；周二再升0.1厘，至6.28厘，比一周前嘅5.48厘水平多近一厘。

喺美息高企下，古天后諗唔到個市會好得去邊，尤其企業盈利情況已大不如前，上月公布業績嘅美企，好多已唔能夠達標，相繼調低今年全年業績預期，零售業更被重創，喺5月美國零售銷售環比錄得下跌0.3%情下，不得不以減價推銷嚟去庫存套現，喺高通脹而息口上升嘅情況下，生產成本不斷上升，但零售市道未如理想，又未能將成本轉嫁予消費者，令美企進入兩難局面。

通脹唔落 美股難脫熊市陰影

美聯儲局一次又一次錯過加息壓抑通脹嘅好機會，令美國陷入目前滯漲局面，呢個係古天后難以睇好美股後市嘅主要原因。而美元高企，令本來以低息借入美元投放到新興市場或其他較高風險資產如虛擬貨幣等資金，喺借貸成本上升下，沽出相關資產而還款予美國銀行。所以美元持續強勢，大量資金回流重返美國銀行體系。而美國縮表嘅同時，就會漸漸吸收呢啲游資。

總之通脹一日唔回落，能源價格仍高企，美股難以擺脫熊市陰影，而其他市場缺乏資金流入，甚至出現資金流走，亦唔慌好得去邊。當市場唔少聲音都指港股可以進一步做好，升破22000點扭轉長達半年嘅弱勢之際，古天后仍然維持大市只係區間上落，要直正突破22000至22500呢個龐大阻力，進一步重返24000水平，似乎暫時未見到符合嘅條件出現。

古天后

(徐狄怡，證監會持牌人)