鏡粉鬧爆MIRROR演唱會賣周邊安排官方撲火再被批：完騷先出貨？

2022-07-07 22:10

ＭIRROR將於本月底舉行首個紅館演唱會，昨日（6日）MIRROR的官方社交平台就率先公開演唱會周邊商品，不過就引來鏡粉不滿沒有出應援手燈。而且官方表示今次所有商品將於MOOV Shop率先獨家網上預購，不少早前課金入官方歌迷會的會員對於再次冇得優先訂購大感不滿，亦擔心貨源不足最後又要同黃牛搶。

昨日（6日）MIRROR的官方社交平台就率先公開演唱會周邊商品。

早前課金入官方歌迷會的會員，對於再次冇得優先訂購周邊商品大感不滿。

MOOV似乎聽到鏡粉的不滿聲音，今晚再於社交網公佈MIRROR演唱會周邊，可於7月8日上午11點開始透過MOOV Shop預購，又強調：「網上預購商品貨量充裕，唔使擔心訂唔到。」而7月中亦會有Pop-up Store現場發售演唱會周邊，不過就要網上預約取籌，「每日籌號有限，於現場購買每款商品亦設有限購數量。」至於鏡粉對冇得優先訂購大感不滿，官方亦表示：「下星期仲會陸續公佈更多活動消息，都會有MIRO獨家專區及MIRO優先體驗安排，記得留意！」

MOOV今晚再出Po強調網上預購商品貨量充裕。

不過留言就集中針對網上預購演唱會周邊後的出貨日期來批評，事關官方講明8月下旬至9月下旬開始發貨，到時都已經開完個演唱會嘞……「過晒演唱會先送貨，咁買黎做乜？諗住着件Tee去睇演唱會，可以慳返」、「吓？演唱會應援…但演唱會後先有？」、「演唱會merch（商品），但冇得演唱會用」、「完左演唱會先發貨係咩玩法」，睇嚟又激嬲米飯班主，呢次點收科呢？