獨家丨湯怡多得麥秋成做最強後盾自家餅店不斷有新搞作

2022-07-20 07:30

湯怡去年5月投資6位數，在荃灣成立自家烘焙品牌「KAKAchevve」實體店及網店，最近她再在金鐘開設Pop- up store，她除了親自落舖打點，「多功能」老公麥秋成亦傍到實，他們預告這只是開始，下月將在九龍區再開Pop- up store，又會推出月餅，湯怡謂能不停有新搞作，全靠有好老公撐住。採訪：杜杜攝影：朱偉彥

去年5月，湯怡在荃灣成立自家烘焙品牌「KAKAchevve」實體店及網店。

想開餅店多年的湯怡，感激有老公鼓勵才能夢想成真。

這天見湯怡和秋成都眼腫腫，他們承認為了Pop- up store冇覺瞓，湯怡說：「都籌備咗兩個月，真係冇得瞓，尤其是我先生，佢呢幾日淨係瞓得兩、三個鐘，因為好多設計同埋包裝上嘅嘢都係佢負責。」秋成就覺得餅店產品才是重點，所以其他事由他一手包辦，「最重要係啲麵包同蛋糕，要擺好多心機落去，所以其他嘢唔好要佢分神，做好個產品係最緊要。」他又搞笑謂有任何設計都不會自作主張，「做資料搜集，最尾都係問老闆意見先決定。」

湯怡和秋成夫婦檔上陣，相當合拍。

湯怡見到客人排長籠來買自己出品，愈做愈精神。

有意引入投資者

見湯怡被客人圍住即時變得生猛，她認同這份滿足感就是辛苦工作的動力，而她有時間一定親自看舖，這也是她跟老公的經營之道，「做咩都要親力親為，唔係擺嚿錢出嚟就坐喺度，唔知發生緊咩事，成件事你落手落腳做，無論係做餅或者賣餅都好，都可以了解多啲客人需要。」秋成再補充，「同埋都要知道員工會遇到啲咩問題。」

出品有麵包、蛋糕及曲奇，但都好畀人掃清，要不斷補貨。

餅店剛宣佈推出手工曲奇月餅，睇嚟他們又有排忙。

兩夫妻又透露，餅店還會有很多新計劃，除了下月會在九龍區開Pop up store外，更會首次推出月餅。湯怡說：「第一次做月餅，口味都會做啲適合大眾嘅，之後再試啲新嘢，而我哋啲月餅全部人手做，唔會用機做。」問到餅店會否再開實體店，湯怡即笑指問她的財政司即秋成，而秋成認為有可能，更不排除會引入其他投資者，「有時唔淨止資金，隨住個投資者都會帶埋知識嚟，咁樣都係一件好事。」講到老公在餅店職位多多，秋成笑稱自己只是工人，但湯怡即賣口乖再讚老公，「生意我一次做，佢又開咗跳舞學校，一定有經驗，好多嘢我都係請教佢。」