古天后日誌｜信心問題令中港股市難見突破

7月25日，天晴，天氣酷熱，氣溫高企，要留意補充水分，提防中暑。上周五美股扭轉連升三日升勢，喺SNAP績後股價急挫近四成嘅情況下，三大指數均見下跌，道指跟標指分別跌137點及37點，納指跑贏跌逾1%，跌225點。10年債息跌以2.75%，反映市場預測明年美儲局或喺美國經濟陷入衰退下而減息。本周四凌晨聯儲局議息，大部分人估計本次議息息率只上調0.75%。其實息率上調0.75%幅度一向未有改變，改變嘅只係市場情緒。

近日美企績後股價表現主導市場情緒，之前多間銀行股盈利均見倒退，但股價未受影響，不跌反升，樂觀情升溫，市場資金再度risk on。但當上周SNAP業績未如理想，股價反應回復正常急跌，樂觀情緒不再高企，美股自然回落。今個星期更多關鍵消息將左右美股走勢，包括周四凌晨美聯儲議息，議息前週二盤後分別有MSFT及GOOG出業績，議息後收市有META，週四盤後有AMZN及AAPL，週五盤前有油股XOM及CVX公佈業績，睇睇市場點樣解讀呢批重磅股嘅業績。

斷供潮暫不會引發系統性風險

至於港股仍然偏弱，以為可以上返20700頸線水平，港股就有望重返21000心理關口，奈何內房債務關題未解決之際，又爆發欄尾樓風波，內地爛尾樓風波動搖外界對中國經濟信心，更有人抓住苦主罷供按揭一事，預警席捲全球且影響國際格局嘅2008年美國次按危機即將重演。

不過古天后則認為今次內地斷供事件，唔應該跟當年美國次按事件相提並論，主要係中國住房按揭的首期要求比當時的美國嚴謹，而如斷供潮未有擴大到更多未完成樓盤，按目前內地在建樓盤5%至9%已爛尾，而且全部有關按揭一律斷供去推算，中國銀行系統嘅住房貸款不良率只會升一個百分點，單憑現時嘅斷供潮並不足以引發系統性風險。

內地按揭斷供風波危機會否升級，要睇民營發展商資金狀況；爛尾樓風波會動搖潛在買家對民企項目嘅信心，一旦銷情更差，資金鏈或惡化，將影響動工。有專家建議解決方案可能係政府設立基金讓爛尾樓盤復工，惟房地產問題複雜，拍板所需時間或比市場所想長得多，遠水好難救得到近火，內地經濟下半年還面臨強大逆風，中港兩地股市同樣面對重重沽壓，暫時只能繼續低位反覆運行，短期難見突破。

古天后

(徐狄怡，證監會持牌人)