黎諾懿落田插秧體會粒粒皆辛苦雙腳慘遭蠓圍攻：咬到冇撻好

2022-08-24 09:00

黎諾懿主持的飲食節目《滿足的味道》，前晚（22日）主題為「煲仔飯」，為了從培苗講起，製作組於元朗錦田農地Set機，花了4個月時間24小時捕捉稻米成長過程，諾懿對此亦嘖嘖稱奇：「通常外國紀錄片先有咁嘅時間去拍，但香港電視史上算少有，因為我哋想畀啲觀眾睇吓農夫有幾辛苦。」

談及於水稻田體驗插秧，一開始在烈日下工作的頭15至20分鐘，反覆踎低起身已令諾懿頭暈兼皮膚灼痛，不過仍不及被蠓咬難忘，他苦笑道：「我一踩落水就成隻腳黑晒，全部都係蠓嚟，咬到隻腳一嚿嚿，冇一撻地方係好㗎，而家諗番都唔想落田呀！」節目還邀來資深師傅公開煮煲仔飯秘技，及「少年食神」林澄光（Michael）推介堪稱「死前必食」的金蠔臘味煲仔飯。

諾懿體驗插秧，他表示很佩服農夫除了要捱日曬雨淋，仲要忍得住畀蠓咬。

原來在水稻田的淤泥上行走，其實十分艱難和辛苦。

諾懿認為鍋巴是煲仔飯的精粹，連他自己都好鍾意食。

「少年食神」林澄光（右）帶諾懿去食堪稱「死前必食」的金蠔臘味煲仔飯。

彩色燒賣打卡首選

明晚（23日）一集除了介紹地道的魚肉及豬肉燒賣，還會介紹滬式糯米燒賣，及以天然食材打造的新派「彩色燒賣」。外形又綠又橙的彩色燒賣「打卡」一流，諾懿亦大讚謂：「味道好傳統，我諗囝囝都會鍾意。」然而即使廿蚊有找的一籠燒賣，背後製作過程卻一啲都唔簡單，西環某老字號老闆便是每日凌晨3點就要開始做點心，諾懿食後大讚抵食：「啲肉食落一粒粒，肉味非常香，油份、冬菇同蝦都配合得好好。」諾懿另外又到另一食店跟師傅學包燒賣，獲師傅大讚有板有眼。

諾懿（右）跟點心師傅學包燒賣，他自嘲：「我包嗰件好似空心、鬆泡泡，但師傅嗰件係好實在。」

「廿四孝老竇」諾懿見到色彩繽紛的新派燒賣，即時想起囝囝。

日籍音樂人波多野裕介（右）帶諾懿品嚐其妻至愛的「蔥油雞扒撈丁」。

鼎爺再度現身推介美味麻辣撈麵

今晚（24日）播出的最後一集，將大談香港人如何把「即食麵」變化出多種食法，好似沙嗲牛肉麵、卡邦尼麵、腐乳雞球撈麵等，更邀得為《滿》創作主題音樂、曾榮獲第36屆香港電影金像獎「最佳原創電影音樂」的日籍音樂人波多野裕介（Yusuke Hatano）一起品嚐其妻至愛的「蔥油雞扒撈丁」；「鼎爺」李家鼎亦會再次現身，向大家推介兩道美味的麻辣撈麵。