陳明憙拍MV親密戲夾好晒極速收貨落水要睇實個妝呻辛苦又醃眼

2022-08-26 12:00

陳明憙（Jocelyn）日前推出《音頻治療單曲系列》第四部曲的《放下的頻率》MV，當中見她與男主角非常親密，除有接吻戲外，二人更要落水：「我其實好少演出自己嘅MV，呢次都好辛苦，因為又打交又要錫錫，一時甜蜜一時分手，情緒起伏好大。其中落水戲份都好辛苦，要睇住個妝有冇溶，又要笑住咁望鏡頭，明明啲海水好『醃眼』都要扮無事。咁大家都知道係拍攝工作，所以親密動作都唔會尷尬，事前都夾好晒位，所以好快搞掂收貨。」

Jocelyn與男主角有親密鏡頭。

Jocelyn個樣好冧。

Jocelyn在MV中情緒起伏好大。

另一場景見到二人爭吵，全屋的水晶小擺設都被摔倒，Jocelyn表示是「暗藏玄機」：「今次首歌錄咗水晶缽嘅聲音，水晶缽好容易打爛，同人嘅心靈一樣咁脆弱。拍呢場戲都好投入，隻手瘀晒，仲要拍通宵，希望大家支持吓。」她坦言現實中並不任性，平日不會亂丟東西發洩：「我份人好理性，即使幾Hurt都好，都唔會亂丟嘢，𠵱家自己住，丟完咪又係我自己執翻，仲驚啲貓貓整親，最多用音樂治療平靜吓心情，甚至好『自虐』咁寫歌，因為呢啲情緒唔係成日有。」

歌曲講述「放下」，Jocelyn指對自己有難度：「因為我係金牛座，所以比較長情，要放低祝福舊愛都好難。今次我都邀請咗啲藝術家，用佢哋嘅方法去表達放下嘅感覺。」