楊千嬅揭丁子高小學雞整蠱行為 與Eason梁漢文「華星三寶」儼如家人

「大笑姑婆」楊千嬅為《有個閨密叫祖藍》做嘉賓，分享大量與老公及仔仔的生活日常。千嬅透露丁子高私下相當貪玩，經常以整蠱她為己任，而發生得最多的整蠱事件是「石春藏手袋」：「佢同啲朋友夾埋，你知日本餐廳門口好多石春，每當我去廁所準備走，佢就將所有石春擺晒喺我個袋度。我奇怪咁重嘅，一打開個袋全部都係石春，你話係咪㷫吖？」千嬅又指丁子高試過扮狗叫令她當眾失儀兼失魂：「佢行行吓街喺後面用隻手拍我隻腳，然後扮狗叫喎，我以為真係有狗咬我咪大嗌囉，咁我一大嗌好大聲㗎嘛，成條街望住我，佢咪喺度笑。」

相反年僅十歲的仔仔Torres思想成熟、且勁識氹媽咪開心：「有次母親節佢寫咭畀我，下款寫Unknown son，我搲晒頭問佢咩嚟，佢話：『我想畀個驚喜你，但我又驚你唔知係我，咪寫埋Son咯』。」Torres又會擔心媽咪要減肥唔食飯，會煮蛋炒飯，令千嬅覺得好窩心。祖藍聞言爆笑回應：「我個女通常搶晒我啲嘢食，不過點都會留番最尾一啖畀我。」

 

千嬅接受祖藍訪問。

千嬅向來都係大笑姑婆，做咗媽咪都一樣。

千嬅話老公丁子高好鍾意將啲石春放入佢手袋。

千嬅話同阿仔相處後，先學懂「掛念原來係要講出嚟」。

 

千嬅又好難忘初入行於華星打拼的日子：「我哋嗰時做好多宣傳，係咁跑通告，一大班人唔同路線用同一個司機，一齊走天涯。她指與華星另外兩寶陳奕迅及梁漢文關係儼如「屋企人咁熟」：「我唔使驚佢哋嬲，咩都會直接講。」她又感激師姐梅艷芳當年對他們這班新人照顧有加，並教曉他們全公司上下是大家庭：「佢對我哋新人好好，因為做新人冇咁上下知名度好難有自己project，阿姐就會帶埋我哋出去攞演出經驗同埋見吓人做吓訪問。」
 

「華星三寶」感情儼如家人。

有時兩父子都會連成一線，管住千嬅飲食。

 

立即下載 | 全新《星島頭條》APP : https://bit.ly/3yLrgYZ