古天后日誌｜港股短暫挾淡倉後缺成交難向上

8月30，部份時間有陽光，有幾陣驟雨雷暴，日間天氣酷熱。美股隔晚續跌，鮑爺上周五放鷹震散美股，三大指數隔晚續跌，道指跌184點、標指跟納指分別跌27點及124點。美國10年期債息喺3-3.1厘附近上落，但兩年期債息則高見3.493厘，升至2007年11月以嚟高位。有別於反映長遠通脹預期、經濟增長潛力嘅10年期債息，2年期債息更多反映市場對未來一段時間貨幣政策走勢睇法。兩年期債息大幅上揚，意味着市場預計聯儲局將會堅持加息，短期內貨幣政策繼續傾向收水。

其實市場唔應該僅將焦點放喺聯儲局取向，企業盈利係左右美股走勢嘅另一個風險因素，通脹高企只會拖累需求，擠壓企業毛利率，當企業盈利將實質下跌，似乎依家美股嘅估值唔算得上便宜。美股搖搖欲墜，歐洲嗰邊問題更大，受俄烏戰事影響，能源價格一直高企，與此同時，歐洲多個港口發生罷工，開始影響貨品正常供應，未來有機會進一步推升物價。

強美元令資金新興市場流走

另一方面，強美元令資金從新興市場流走，美匯指數升至109.48，逼近7月高位，強美元拖累美股以外股市表現，更誘使外資大舉沽空。而港股上周四半日市忽然急升，挾淡倉意味甚濃，此前港股沽空水平達到兩成，上周四挾淡倉，但僅僅一個交易日成交額叫有啲睇頭，至中午及噚日嘅成交又回復奀豬狀態。

港股今日期指結算，上周四挾完淡倉，雖然恒指重上20000水平，但未見成交配合，兼且重磅股業績已出得七七八八，短線港股無乜利好消息。至於有關中概審計暫達成協議，但消息消化過後，難以支持港股進一步向上，始終喺缺水下，港股都係一潭死水。

古天后

(徐狄怡，證監會持牌人)