獨家丨馬國明慈父上身：貓女黐媽咪多啲 新手貓奴甜講貓經預習做父母

馬國明在劇集《白色強人II》再演「唐明」，跟郭晉安及陳豪合作，最開心到內地拍攝時經常聚會，聽到兩位爸爸分享湊仔經，雖然馬明未有正式計劃同湯洛雯結婚，但兩人早前開始同居兼養了一對貓，令馬明有機會預習做「爸爸」，日日享受做「貓奴」湊貓。馬明提起一對寶貝貓，全程溫柔聲加冧爆眼神，30分鐘訪問講足20分鐘貓經，連講7次「仔女」好得意，更心心眼表示「貓女通常黐『媽咪』（靚湯）多啲。」好Sweet呀！採訪：杜杜 攝影：譚志光　場地：荷里活廣場莆田

馬明和靚湯年前在將軍澳租屋同居，未結婚先預習做「父母」。

馬明話今次拍《白色強人II》特別開心，因跟拍檔到內地住埋同一間酒店互相照應，感情特別好，「阿Mo（陳豪）直情沖咖啡送去我哋房，好似一班學生去宿營，收工就搵地方食飯，愈傾愈講得多私人嘢，大家會更加熟更加Friend，感覺好開心。」

馬明跟《白色強人II》一班演員合作開心，更獲安仔和阿Mo分享心得。

學定做老公老竇

已組織家庭的安仔和阿Mo更狂向馬明分享經驗，雖然未有加快他結婚步履，但真係學到嘢，「我鍾意聽呀！譬如佢哋搵屋揀邊區，使唔使就小朋友啲學校網？雖然我𠵱家未係爹哋，佢哋連搞結婚同夫妻相處之道都有講，好多嘢已經袋咗落袋，哈哈！」馬明同靚湯以結婚為大前題交往，年前更在將軍澳租屋同居，但強調同居目的只為防疫，「之前我同佢都拍劇拍得好密，間屋其實係隔離屋，我哋拍劇又唔可以戴口罩，中咗又唔知，好驚返屋企會感染到爹哋媽咪。」早前馬明曾中招，幸好已搬出來住冇傳染家人。

早前靚湯突然放閃，由於甜度太高，又被大家催婚。

絕密馬明爹哋視角

馬明對「子女」事特別上心，訪問後即搵靚相傳給記者，但最搞笑串錯囡囡名，第二朝先醒起，而回覆短訊時已全用各式貓貓圖像。

馬明承認手機Save大量「子女」寫真相，這張見到Ariel（左）和Valentino幾相親相愛。

記者讚Ariel靚女，馬明搞笑用「記低佢先」圖像回覆。

馬明承認手機Save大量「子女」寫真相，這張見到Ariel（左）和Valentino幾相親相愛。

好似湊小朋友咁

同居生活令馬明最開心，其中一樣肯定是跟靚湯預習做「父母」，他們養了一對布偶貓Valentino和Ariel，囝囝名由馬明改，囡囡名就由靚湯改。兩人由貓B餵奶期親手湊到現在約一歲大，所以一提到「仔女」，馬明就勁興奮，秒速慈父上身，「今朝佢哋四點幾五點就嘈醒我，冇嘢食肚餓囉！我哋睇過一啲貓節目講，貓晨早或者黃昏最活躍，人湊小朋友十二點食完奶三、四點又再食，𠵱家好似有少少湊小朋友嘅感覺。」呢位新任「貓奴」狂讚「仔女」，「佢哋好似隻狗仔咁㗎！識畀手同坐低，早排我隻貓女有隻眼發炎，我一話滴藥水，佢就走咗去，好似識聽廣東話，匿埋搵唔到佢，好似小朋友。」

今年5月靚湯生日，帶埋「仔女」去staycation，馬明都有同行。

馬明讚靚湯是「好媽咪」，教得「仔女」又乖又叻。

每日返工要交待

馬明已完全被「仔女」融化，仲會自稱「爸爸」，「都會話過嚟爹哋度，對住啲貓係會好冧，佢哋好嗲，我都幾享受，去邊都黐住，喺我腳邊徘徊，搵條尾掃吓，搵個頭捽吓，又反肚，係好得意！」就連去開工都要跟「仔女」交代，雖然冇晒自由，但馬明覺得好幸福，「我每日開工都要同佢哋講，佢哋見我換衫，就跑晒去門，頂住唔畀我出去，我要同佢哋講好快返，推開佢哋先捐到出去。」雖然Ariel似畫了眼線超靚，但馬明強調「仔女」一樣錫絕無偏心，更自爆，「女通常黐『媽咪』（靚湯）多啲，隻仔就黐我多啲，係好得意㗎！」雖然他已擔心有日「仔女」離開時會好傷心，但他跟靚湯未打算要他們開枝散葉，「有研究過好唔好畀佢哋生，但係一生四、五隻，畀邊隻人！？我揀唔落手，五隻都係佢哋嘅仔女，咁唔好煩唔好生，暫時兩隻夠嘞！」

馬明扮埋「仔女」頂住道門唔畀返工，勁搞笑！

近日靚湯到澳洲工作，馬明首次獨力照顧貓貓，「媽咪」每次通電話第一時間是關心「仔女」情況。

馬明坦言入行以來寧攞獎金不要獎品，所以不期望再憑「唐明」一角攞視帝。

立即下載 | 全新《星島頭條》APP https://bit.ly/3yLrgYZ