袁偉豪「食軟飯」覺得受欺凌認面皮厚走樣關甩髮事

2022-09-02 15:30

41歲的袁偉豪於2020年娶富貴妻張寶兒，此後被封為「億萬駙馬」，網民笑指「入贅」女家。前年二人出席台慶時，袁偉豪再被指婚後走樣兼衰老，當時他已即在社交網發長文回應負面批評，稱會繼續努力做好自己，被網民寸EQ低。事隔兩年，袁偉豪剛從外地返港隔離期間，趁老婆張寶兒在IG開直播時，就於臨尾半小時現身，更重提「食軟飯」及「入贅」女家事件，大講心底話，主動為自己平反。

袁偉豪於2020年娶張寶兒。

袁偉豪好介意被人取笑「入贅」女家。

而家係逆齡

袁偉豪剛加入直播時，邊搽護膚品為臉部保養，獲得老婆讚賞，不過因為太大力，令張寶兒有微言，他就說：「我面皮厚，要大力少少」，之後他疑不滿網民的冷嘲熱諷，當有人指他老了不少時，就表示：「老了不少？呢啲唔好講，你識咗我廿幾年，梗係老，你哋成日記住我30歲嗰時，點同呢。」老婆張寶兒就乘機為老公平反︰「對於啲人話你老，我真係好想講一句，其實好多人老去係正常，點解老唔值得去欣賞，後生有後生嘅活力，但老真係經過好多人生閱歷，人生更加豐富同沉穩，應該值得欣賞，呢兩年你keep得好好，你經歷完咁多辛苦，你而家係反彈、逆齡，狀態好咗好多，佢真係做咗好多功夫。」

得到張寶兒幫口，袁偉豪就得戚說︰「老婆真係幫我講說話，話我逆齡。因為我識得好勁嘅招數嚟保養……四個字，你哋估下。」網民即估︰「早睡早起」、「葵花寶典」、「扮樂易玲」等，二人見到「扮樂易玲」即大笑出來，不過袁偉豪開估是「採陰補陽」，張寶兒說：「即係聽晒老婆話啦！」他則指是成人話題，深夜兩點是時候講呢啲。他解釋被指走樣殘爆，事實上因當時同期拍《ICAC》及《法證先鋒V》，在不足休息時間又大壓力之下，才會拍至甩頭髮，身體亦因此變差。

袁偉豪前年與張寶兒出席台慶時，被指婚後走樣兼衰老。

袁偉豪加入老婆的直播，正搽護膚品為臉部進行保養。

啲人無良心

袁偉豪深夜放負，自言因被指「食軟飯」曾情緒低落，聽得出他為此事耿耿於懷：「傳媒集中報道點樣去置業，我點樣嫁咗俾你，我點樣食軟飯，每一句每一句好少嘅說話或者每一次好簡單嘅報道，其實係逐少逐少注入我內心，當然會唔開心啦，咁多年嘅努力，經歷咗廿幾年、喺TVB做咗10幾年嘢，有成績、市場接受自己有角色，搵到錢儲到錢，搵到一個自己鍾意嘅人去結婚，就算到呢一刻使晒啲錢又如何呢，呢兩年都係食老本無問題，咪重新嚟過囉，但係面對啲人仲係話我係食軟飯，又話我姓張，嗰啲人好無良心。」他稱在直播公開講，因覺得已過去，現時好開心，亦沒有嘢令他唔開心，過了很多難關。

袁偉豪話當時疊住兩劇開工，失眠又壓力大，導致甩頭髮。

袁偉豪獲老婆平反，狀態已好咗好多。

叫老婆訪問

自言過去兩年沒有做專訪收埋自己，袁偉豪認為疫情有影響：「又冇商演，我哋又出唔到去做嘢，呢段時間見到我出返嚟喺綜藝見面，即係我Ready囉，Ready去見大家囉，過去兩年我一個專訪都冇做到，就係因為某一間傳媒對我係有特別嘅針對啦，自從我哋結婚買樓開始，就針對我、針對你張寶兒啦，所以過去兩年我冇再製造任何機會俾人再去講嘢，喺呢個live夜深同大家傾偈，講下心底話，無傷大雅，我又開心大家又開心。我相信冇一個人會喜歡企喺呢個圈被人欺負俾人蝦，喺度欺凌緊一個人。」他直言想交個波給張寶兒：「其實以後唔使做訪問，我開live你訪問我咪得，啲話題又有養份，又唔使俾人放大。」老婆當然力撐，但亦有打圓場：「每個artist都有難處啦。」