古天后日誌｜港股跌至蔗渣價亦未有人吼

10月12日，天晴，陽光普照，早晚較清涼，日間非常乾燥。隔晚美股表現反覆，盤中三大指數曾顯著下跌，最終道指收復失地倒升37點；但標指跟納指分別下跌23點及115點，主要受晶片股急挫所拖累。

雖然大摩有分析指美股仍有兩成下跌空間，不過目前美股流動性仍充裕，淡友亦未敢太放肆，嚟到呢啲位，都見淡倉食糊，令美股喺水平似跌非跌，而美銀嘅資金流報告，更顯示上周錄得61億美元淨流入美股，已經係連續第五個星期錄得淨流入，而機構投資者主要買入ETF及大價股，消費股跟重磅科網股係投資者入貨對象，相反無盈利基礎嘅細價股，則連續兩周被減持。

IMF再下調全球經濟預測，雖然維持今年全球增長為3.2%，但下周明年增長至2.7%，並同時警告，若明年經濟狀況無改善，2024年全球經濟增長更會跌至2%以下。另一方面，IMF預期通脹回落速度緩慢，今年全球經濟達4.7%，明年則降至6.5%，要待2024年通脹才有望回落至4.1%水平。

美元強勢令全球多國出現美元荒，尤其歐洲及新興市場，而中國幸好流動性仍然強勁，阿爺一直利用寛鬆貨幣政策應對，不過喺樓價下跌令財富效應大大縮減下，人行再印銀紙亦徒勞無功，咁嘅情況下，內地經濟好難喺短期內反彈。相對中國，歐洲情況較為惡劣，已有金融機構傳出要由央行出手打救。一旦歐洲多國同時出現類似情況，小心黑天鵝出現。

至於港股繼續尋底，港股接連跌穿一個又一個心埋關口，萬八失守又到萬七跌穿，港股日日都係嗰句，又創N年新低，基本上對住港股都無話可說，港股估值已跌至蔗渣價錢，亦未見有資金入場，淡友得勢不饒人，大市自然每況愈下，直至有資金肯入場撈貨，淡友先會考慮鳴金收兵，但暫時似乎未見到呢個情況出現，投資者保本為上，亦只有耐心等待。