古天后日誌｜港股低處未自低繼續尋底

10月24日，天晴乾燥，間中吹強風。美股上周五反彈，轉跌為升，三大指數齊齊升逾2%，留意標指反彈阻力3800，納指反彈阻力11000，技術反彈已接近尾聲，睇嚟今個星期嘅業績，會成為大市焦點，美股反彈更上一層樓，抑或隨住業績公布未如理想而結束反彈，今個星期會有定案。週二晚收市後有Google及Msft，週三盤前有Meta及波音，週四有AAPL及Amazon。上周美企公布業績後，市場反應普遍正面，睇嚟美股仲有能力喺本周反彈。

其實美股的確比起其他股市表現強勁，當全球面對住經濟陷入衰退嘅困境之際，美國仍有過千萬個待業職位，失業率保持低位，經濟表現明顯較其他地區強勁，加上強美元吸引更多資金流入，美元成為資金避風港，全球資金加快流入美元及美股，單係8月份外資流入美股就錄得淨買入2756億美元，同比增加220%，同時係自2020年3月爆發疫情以嚟，第二大單月淨流入，相對其他股市，呢個係美股獨強原因。

美元強勁，其他貨幣倒水咁倒，日圓及人民幣匯價屢創低位，歐元跟英鎊亦跌到一仆一碌，港元雖然跟美元掛鈎，相對其他地區貨幣係強，但對美元其實都係跌咗，金管局日日接美元接到手軟，美國唔缺錢，但其他地方就出現美元荒。人民幣日復日跌，二十大結束後，人民幣繼續走弱，美股上周五雖反彈，不過金龍指數跟唔到，中概股繼續走軟，而A股成交亦淡靜，外資已連續多月錄得淨流出。

以為今日港股可以借美股反彈做返好啲，但南北韓傳來雙方開火，睇嚟今日港股無運行，重點係港股上周四反彈，成交重上千億元後，周五成交額又打回原形，不足千億元，可見無資金肯入場跟淡友對抗，港股陰乾情況未改，仍然係以一浪低於一浪嘅形態走向更低位，低處未算低，繼續尋底。