獨家丨葉念琛睇好陳瀅蔣家旻攞獎網友狂鬧大結局開心觀眾咁投入

2022-11-03 08:00

葉念琛首次為TVB製作的劇集《美麗戰場》已播畢，結局周收視最高22.8點，對於這個第一次，葉導以「美麗戰場，美麗結局」作總結，因不論收視、口碑及網上熱討程度，反應都很好，他對成績相當滿意。不過問到開續集機會，葉導坦承仍未收到TVB通知，而對於該劇能否在頒獎禮奪獎，他睇好陳瀅和蔣家旻，更認為林盛斌有機會黑馬跑出。採訪：杜杜

葉導成功捧紅劇中一班女主角，他都覺得好滿意。

葉導坦承面對這個第一次，最初確實好緊張，特別過去一周的結局篇，幸好剛公佈的收視結果，該劇最高有22.8點，比起三個視帝和兩個視后孭飛的《白色強人II》的22.5點成績更佳，「最初有啲緊張，始終有好多外在因素影響，隔離台又有新劇播，但𠵱家好滿意結局周收視最高22.8點，同《愛•回家之開心速遞》打成平手，而八點半檔嘅《下流上車族》最高收視23.7點，咁通常九點半檔收視偏低，所以算對老闆有交待。」

結局一集，「小美」慘死令觀眾睇好肉緊。

收視暴升4點近年少見
以「美麗戰場，美麗結局」作總結，葉導認為因劇集幾方面成績都很亮眼，先講收視成績，能夠由開播到結局升足4點實在不容易，「首周18.7點，第二周19.1點，第三周20.7點，到𠵱家有22.8點，證明係一路穩陣咁向上升，完全冇跌過，而且由18.7到22.8點，係升咗成4點，咁樣嘅成績係近年好少見。」

結局收視好，亦引發全城熱話，葉導對成績相當滿意。

除了收視成績好，葉導認為以電影模式宣傳發揮到功效，令口碑及網上熱討反應都極佳，「首先要多謝一眾傳媒朋友幫手，我今次當電影嘅marketing咁做宣傳係成功嘅，亦都要多謝TVB嘅同事都好配合，雖然宣傳片或者預告我一早畀咗方向佢哋去剪，但好似結局一集嘅預告，我要佢哋改，又遲至周四6點先至approve，佢哋都好配合我。」葉導覺得最難得在社交平台氣氛都非常好，「好似『反骨琪』被強姦一幕嘅精華片段，點擊已超過100萬，成套劇都製造咗好多話題，而且好多人喺網上睇返重溫，所以一路排住第一位，其實最後五集好多人話節奏太快，就係我留意到潮流唔同咗，預咗好多人網上睇，呢個節奏好啱一氣呵成咁睇。」

「反骨琪」被「威爺」強姦戲份，播出以來一直成熱話。

「反骨琪」被「威爺」強姦一幕的精華片段，網上點擊已超過100萬。

觀眾被流傳結局誤導
講到開放式結局，引起好多觀眾不滿，葉導完全唔怕大家鬧，「播完個結局好多人湧去我個社交網留言，我全部都有睇，好壞都有睇，就算畀人鬧我都好開心，因為好耐冇試過大家咁投入去睇一個電視劇。我諗大家反應咁大，同之前網上流傳咗好幾個結局，譬如話『反骨琪』會回歸殺晒所有人，令到大家以為係真，所以同預期有落差，大家先接受唔到。」他承認拍了好幾個結局備用，「但係幾個結局唔算係分別好大，而最終咁樣剪係睇大家反應，對每個角色嘅認受性。」

大結局播出當晚，葉導跟一班演員一齊睇，原來除了網民追問他結局意思，連一眾演員亦有問他。

結局時，「反骨琪」只現身一個鏡頭。

至於開拍續集，葉導坦承好被動，「睇收視嘅話，《痞子殿下》都係22.8點都決定開續集，但我暫時都未收到官方嘅消息，若然真係要開第二季，我覺得一定要原班人馬，同埋會畀返第一季完整嘅結局大家，不過就算開續集，我都要諗通點發展先得。」另外，他最關心是幾時真正放假，「除咗想搞慶功宴外，最想去個旅行先，咩都唔諗住，因為呢十個月為呢個project真係冇停過，好想放鬆一下先再諗。」