古天后日誌｜熊市反彈幅度驚人 無謂逆市做淡友

11月7日，大致多雲，早上有幾陣驟雨，日間部份時間有陽光。美股連跌四個交易日後，上周五反彈，道指升402點；標指則升50點，納指亦錄得132點升幅。經過幾日調整，美股嘅超買情況已有改善，雖然高位有回吐，但標指跟納指都暫守短線支持。目前已有超過八成美企公布業績，扣除能源板塊盈利出現倒退3.4%，標指500盈利平均錄得超過4%增長。企業盈利表現仍然係決定後市表現嘅最主要因素，有分析指美股要待真正衰退來臨，美聯儲局先會結束緊縮周期，而標指可能喺明年上半年才見底回升。

目前左右投資市場主要是息口走勢，今年上半年美聯儲一直錯估形勢，喺下半年加快加息步伐後，息口頂部估算不斷推升。CPI明年3月會急速放緩，當息口升至5%時，美國PCE慢慢回落至3%，息口便開始見頂，隨著PCE繼續回落，市場開始炒減息，美股就有機真正見底回升。暫時看美國經濟底子強，衰退較想像中輕微。

雖然上周五再有消息指股神再度減持比亞迪(01211)股份，但無阻上周五中概股繼續強勢，喺人民幣上周五反彈下，中概股強勢反彈，港股上周成交keep住暢旺，就連打風得半日市多少少，成交亦未見明顯縮減，上周五更借內地通關及中概股完成審計兩大消息，一度挾升千點，最終全日升821點至16161點收市，成交額增至1886億元，成交額亦能配合升勢。

目前恒指已成功回升至20日線水平，重返16000點，預期20日線將會係好友主力防線，只要一日仲守位呢條線，港股仍有條件繼續反彈。反彈初期以重磅科技股ATMJ為主力，不過上周五升勢已伸延至其他科技股，甚至其他板塊股份亦見有資金追入，升勢頗為全面。暫時反彈目標係17000-17500左右，17500亦係50日線之所在，預期50日線唔係咁容易收復，只要成交額維持1200億以上，反彈勢頭持續，當成交額又再縮水至1000億樓下，咁就要提高警覺，畢竟大方向仍處於熊市之中，只係熊市反彈幅度可以好驚人，就算唔睇好後市都好，呢啲時候就無謂對著幹，逆市而行做淡友。