世界盃2022｜專家分析:玩轉「老」朋友
2022-12-13 15:16 
嚟緊世界盃四強嘅第一組戲碼將會由阿根廷對上克羅地亞，亦係兩位老將美斯及莫迪歷繼上年歐聯後再次於大賽對碰。
如果有留意佢哋今屆嘅表現，應該都會同意呢個四強晉級之路唔算平坦。阿根廷於首場比賽爆冷負於沙特阿拉伯，淘汰賽面對澳洲同荷蘭時，完全無力應對對方於尾段使出嘅高空轟炸，對荷蘭一役更於末段連失兩球。而克羅地亞在第三場分組賽對比利時嘅生死戰，要不是對方盧卡古屢誤戎機，恐怕克羅地亞早已提早畢業。上一場對巴西雖然成功打亂巴西節奏，但最後扳平嘅入球其實有幸運成分。無獨有偶，兩隊於八強時亦要踢畢一百二十分鐘賽事，再以十二碼分勝負，所以雙方體力損耗其實亦唔少。
由於克羅地亞已經連續兩場比賽要踢畢加時，而阿根廷對荷蘭嘅比賽亦由於雙方都踢得太「熱血」，今仗有左右二閘干沙路蒙迪爾及馬高斯阿古拿要停賽，尤其是阿古拿於左路嘅機動力，更不可缺少。所以筆者認為呢場比賽，雙方會放慢節奏致入球不會太多。
上文提過莫迪歷同美斯曾在上季於歐聯交手，當時係皇馬將巴黎聖日耳門淘汰出局，加上美斯嘅球會隊友尼馬，咁啱又係莫迪歷腳下敗將，未知美斯嘅命運又會如何？ -球樂
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
關鍵字
最新回應