蕭若元反擊劉鑾雄冇新聞價值 再爆料直指大劉助養賊王家人
2023-01-04 17:30 
富商「大劉」劉鑾雄昨日召開歷時1個半時時的記者會，回應最近的傳聞，字字珠璣勁寸昔日舊愛呂麗君和李嘉欣，大劉在記者會中亦數度提到，現在開YouTube Channel的蕭若元日前在片段中提及他，怒斥對方靠他呃like。蕭若元昨晚即拍片反駁大劉，他在片段中開始已說：「俾人痛斥我都慣㗎啦，我成日都俾人鬧，咁多haters係咪？但係俾咁有錢嘅人公開鬧就少見啲嘅。」之後更直指大劉已經沒有新聞價值。
【相關閱讀】：劉鑾雄記者會！大劉足本版全筆錄 形容呂麗君、李嘉欣句句有骨
蕭若元在片中繼續他時事評論員慣常動作「讀新聞」，他指大劉記者會不能夠拍片，記者電話被公關收走：「（記者）都係記得幾多講，唔准錄音。」不過事實大劉記者會只是禁止拍攝影片，准許錄音，事後公關亦有向傳媒發放記者會錄音聲帶。蕭若元續提到大劉在記招中斥蕭若元造謠他患躁狂症，並指只和蕭若元見過一次面。蕭若元反駁指：「我識佢係86、87年，可能佢貴人事忙，完全唔記得晒。有一次我同佢同時睇住香港政府救市，用1000億，另外仲有幾次次睇住政府沽空救市，頂住啲大䲔，係大家坐喺度一齊睇。」
講躁狂症笠頭盔
大劉在記者澄清自己並無躁狂症，蕭若元笠頭盔說：「我要聲明先，我所謂佢有躁狂症，係layman（門外漢）講嘅嘢，即係唔係專業人士講嘅。我所謂嘅『躁狂症』，係好多時會發發脾氣，脾氣好猛烈，去到不能自控，發得比較多。躁狂症係一個情緒病，係咪病都好難define（界定），但如果醫生話佢冇，我願意澄清呢樣嘢。」大劉在記者會上反指自己可能有創傷後遺症，不過蕭若元卻指：「創傷後遺症就係會引起躁狂症，兩樣嘢係冇咩分別，躁狂係一種表達方式。」
大劉在記者會指諒解蕭若元，不會狀告對方直說：「佢搵到食使乜咁吖，如果有日我要喺平台呃like，就大X鑊。」蕭若元即展示自己的YouTube數據聲稱：「我講劉鑾雄嘅片排第20，得18萬4，我唔需要搵佢呃like，肥媽都25萬，所以我講佢唔會令我view數增加，一般嚟講劉鑾雄已經冇新聞價值，因為佢退出江湖咁耐。香港新聞嘈得咁犀利嘅嘢，我作為一個時事評論員就有責任解釋，講呢個社會現象。」
「可以隨時電郵指證」
蕭若元續言：「我講嘅嘢有兩部份，A部份係facts（事實），B部份叫意見。Facts係可以查證嘅，如果我講到任何人，包括大劉在內，可以隨時電郵畀我指證，我一定更正。如果呢單嘢係嚴重錯誤，我會道歉，關於劉生嘅嘢亦都係一樣。例如躁狂，係因為好多人話你經常發脾氣，如果你有醫生證明，叫醫生寫封信畀我，我咪道歉囉！好簡單。」並指其他是意見：「意見就冇辦法作客觀評定，我話佢最愛李嘉欣，佢話『我都唔知自己最愛邊個』，係啊，你可以唔知㗎，但呢個係旁人睇，呢個係外人嘅感覺。」
蕭若元提到大劉指會打擊他的平台，他澄清說：「每次講劉生都係佢整鑊大新聞，我唔會主觀地講劉鑾雄，同我講李嘉誠、何鴻燊唔同，佢哋我列咗入商界十大梟雄，劉生唔喺入面，佢嘅事業冇達到呢個境界，睇唔到你生意上有乜傑出表現。」提到大劉在記者會中表示不會狀告蕭若元，或找朋友到台灣拜會他，蕭若元指對方有三重解釋：「A解釋，你真係唔會咁做；B解釋，如果我再講你就會咁做；C解釋，你話你唔會咁做，如果真係有人拜訪我，就唔會入你數。大家覺得係乜嘢？佢嗰兩件事件入面，我係所有人入面講嘢最公正，冇任何仇富思想，都冇牽涉佢其他嘢，佢嗰啲女明星嘅嘢，我一句都冇提過。」
「有錢人冇社會地位」
「最後一點聲明，佢私人嘅事我唔會講，如果佢惹咗好大嘅新聞出嚟我就有責任講，但係我2月1日之後出品就會少好多。」蕭若元最後再度重申評論大劉的事不會帶契他：「佢比肥媽都爭好遠，大家睇見成個12月，佢重要性只係排20。我第一條片百幾萬，許志安嗰啲70、80萬，許志安嘅新聞性遠在劉生之上，你唔好以為有錢人大晒，喺歷史上有錢人冇乜社會地位，邊個記得70年前香港最有錢係邊個，你周街問人冇人識㗎喎！你覺得自己重要，就係overrated（高估了）自己。李嘉誠都冇乜地位，何況係你？」
大劉在記者會上表示有「助養」舊愛，蕭若元表示高度讚揚，卻同時爆料：「佢仲有助養葉繼歡家人，佢非常同情葉繼歡。」而翻查資料顯示，有香港賊王之稱的葉繼歡原來曾為大劉打工，於70年代在大劉的風扇廠摩打部負責「繞電線」工作。而在葉繼歡離職之後，大劉曾承認其名下慈善基金曾資助葉繼歡在廣州的妻女。
【其他閱讀】：
46歲陳少霞激罕登陸綜重演《鹿鼎記》雙兒 嫁富商添女兒凍齡零瑕疵近況曝光
周汶錡兩位混血囝囝愈大愈似樣勁靚仔 頂「頭盔頭」狂揈變搖滾巨星High爆
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應