古天后日誌｜港股美股進入高位震盪期候回調吸納

1月12日，大致多雲，有一兩陣雨，明日氣溫回暖，但周日稍後時間氣溫再度顯著下降。雖然早前聯儲局再有官員放鷹，表示息口將維持5%一段時間，今年亦無減息空間，但美股不跌反升，道指更連升四日，隔晚再升268點；標指跟納指分別升1.2%及1.7%。標指成功守住3800支持後，重返3900-4100嘅移動區間之內，但4100阻力唔細，不過10年期債息回落至3.5%，市場信心回復，認為下半年仍有機會減息。

早前多間大行齊齊唱淡美國經齊，當然同時唱淡美股，不過從多項經濟數據分析，美國經濟並唔係太差，尤其就業市場，失業率回落至3.55%，民眾生活未見陷入難關之中，甚至喺收入增加，能源支持下降嘅情況下，更願意出外消費，呢樣嘢可以從零售股扭轉去年弱中反映，唔少零售股已收復失地，從低回升。暫時話美國經濟將陷入衰退似乎過於武斷，其實所謂衰退，早於去年息差出現倒掛或已出現，並於第三季見GDP回升，喺通脹回落之際，美國經濟已擺短去年上半短暫嘅衰退，嚟緊要睇住CPI跟PCE嘅回落速度，如果能夠加速回落，美股有望再恢復活力，但暫時就喺現水平徘徊。

噚日講過歐洲喺2023年呢10日八日期間，已經發行咗超過1500億美元嘅企債，反映市場游資仍相當充裕，即使過過去年踏入加息周期，但因為之前長達超過十年嘅QE令市場一直水浸，只要市場資金充裕，股市真係唔會死得去邊。尤其當美股已從高位回落咗唔少，資金更積極尋找具有價值嘅合理資產進行投資，而股市正正係資金尋找機會嘅地方。不過噚日市場都係比較審慎，尤其美股又好，港股又好，都未見再有資金喺現水平大手入貨，或者都係等緊回調，加上近日不斷嘅配股，亦抽去市場唔少資金。呢一輪升浪隨時出現回調，又或於現水平震盪，暫時入貨值博率較低，唯有靜待機會，待回吐伺機收集。