古天后日誌｜港股繼續高位整固 少做少錯唔做唔錯

1月18日，天晴，天氣乾燥，早晚天氣寒冷。美股隔晚個別發展，道指跟標指回吐，前者跌391點，標指則跌8點，4000點始終未能收復，但納指連升多日，隔晚仍保持16點升幅。上周五唔少美國銀行已派成績表，普遍再增加撥備，呢個舉動係反映銀行對貸款人還款能力有所懷疑。雖然如此，但銀行股公布業績後，普遍低開高走，部份更倒升收市，市場嘅策略目前係逢低買進。不過到早兩日到高盛公布業績差過市場預期，股價就下跌6%，拖累銀行股偏軟，道指自然回落。

債息回落至3.5%，科技股有追，納指喺10200水平已三次不破，並喺該水平做咗個底，但11500係較大阻力，暫時只要息口唔再掉頭回升，科技股係更具吸引力，加上唔少重磅科技股較高位已回落超過五成，資金買入有質素嘅重磅科技股，令納指有一定支持及反彈。好似Tesla跟蘋果公司，前者減價促銷，後者出貨率減少，兩者股價下跌後，近日已開始築底回升，亦帶動納指做好。

至於中國方面，唔再提住清零政策，防疫政策調整，甚至已開關步入復常之路，唔少資金都期待世界工廠可以全面復工，再次投入全球供應鏈，國際資金已積極買入A股。唔單止A股回升，資源價格亦削削攀升，油價亦回升至每桶80美元水平，留意回升嘅資源價格，會否刺激通脹回升，一旦通脹回升，今年預期息口調頭回落預期落空，或拖累股市走軟。

至於港股喺短短兩個月已累升五成，A股較港股有更大值博率，外資積極買A股更甚於港股係值博率問題。之前中港兩地股市已偷步炒通關消息，餐飲股炒咗上去但無以為繼，主要係通關後生意不似預期，留意消費股會否步餐飲股後塵，尤其本地零售股，未見大量南下內地旅客，每日只見大量港客北上，本地零售股未能受惠。

港股嚟到呢啲位，一直未見較大幅度回調，現水平追貨值博率大減，雖然大市似乎仍有機會挑戰22000至22500，但長假期在即，現水平先嚟博呢一千幾百點意義唔大，古天后都係保持輕倉上路，仍持有小量重磅股過假期，暫時小做小錯，唔做唔錯。