古天后日志｜港股继续高位整固 少做少错唔做唔错

1月18日，天晴，天气乾燥，早晚天气寒冷。美股隔晚个别发展，道指跟标指回吐，前者跌391点，标指则跌8点，4000点始终未能收复，但纳指连升多日，隔晚仍保持16点升幅。上周五唔少美国银行已派成绩表，普遍再增加拨备，呢个举动系反映银行对贷款人还款能力有所怀疑。虽然如此，但银行股公布业绩后，普遍低开高走，部份更倒升收市，市场嘅策略目前系逢低买进。不过到早两日到高盛公布业绩差过市场预期，股价就下跌6%，拖累银行股偏软，道指自然回落。

债息回落至3.5%，科技股有追，纳指喺10200水平已三次不破，并喺该水平做咗个底，但11500系较大阻力，暂时只要息口唔再掉头回升，科技股系更具吸引力，加上唔少重磅科技股较高位已回落超过五成，资金买入有质素嘅重磅科技股，令纳指有一定支持及反弹。好似Tesla跟苹果公司，前者减价促销，后者出货率减少，两者股价下跌后，近日已开始筑底回升，亦带动纳指做好。

至于中国方面，唔再提住清零政策，防疫政策调整，甚至已开关步入复常之路，唔少资金都期待世界工厂可以全面复工，再次投入全球供应链，国际资金已积极买入A股。唔单止A股回升，资源价格亦削削攀升，油价亦回升至每桶80美元水平，留意回升嘅资源价格，会否刺激通胀回升，一旦通胀回升，今年预期息口调头回落预期落空，或拖累股市走软。

至于港股喺短短两个月已累升五成，A股较港股有更大值博率，外资积极买A股更甚于港股系值博率问题。之前中港两地股市已偷步炒通关消息，餐饮股炒咗上去但无以为继，主要系通关后生意不似预期，留意消费股会否步餐饮股后尘，尤其本地零售股，未见大量南下内地旅客，每日只见大量港客北上，本地零售股未能受惠。

港股嚟到呢啲位，一直未见较大幅度回调，现水平追货值博率大减，虽然大市似乎仍有机会挑战22000至22500，但长假期在即，现水平先嚟博呢一千几百点意义唔大，古天后都系保持轻仓上路，仍持有小量重磅股过假期，暂时小做小错，唔做唔错。