古天后日誌｜港股調整持續 50或250日線料有支持

2月13日，大致多雲，有霧及一兩陣雨，日間短暫時間有陽光，明日天氣顯著下降。上周五美股表現反覆，先跌後回升，道指收市升逾百點，標指亦升8點，只有納指跌71點收市。美股業績期漸過，美股焦點重新放喺利息走勢上，經過2月初加息0.25厘後，市場亦已消化3月再加息0.25厘，目前市場考量嘅係5月會唔會再息，抑或息口喺4.75厘定喺5厘停落嚟。至於減息目前言之常早，而鮑爺亦已放晒風，暫時唔會減息住，因為通脹未確定已完全受控。

明晚美國將會公布1月份CPI，估計CPI或由6.5%放緩至6.2%，核心CPI由5.7%放緩至5.5%。值得留意美國嘅二手車市場價格未有大幅回落，主要係新車交付緩慢，令二手車價格高居不下，而房租價格將有四至六個月滯後，回落嘅租金亦未必會喺1月份嘅CPI反映出嚟。所以今次1月份CPI預期唔會見到顯著回落。

美股經過1月嘅亢奮，嚟到現水平開始變得反覆，主要係美國經濟雖冇之前預期咁差，陷入衰退機會大減，或有木機會軟著陸，但唔代表美國經濟好好環境，標指由3500水平反彈至4100水平之上，反覆幅度已達兩成，若然美國經濟已係穩定落去，出現L型橫向走勢，美股喺現水平再大幅上升嘅條件有限，嚟緊可能會進入有波幅，冇升幅嘅狀況。尤其喺息率走勢短期唔會出現大轉向，暫停加息後亦唔見得會急急大逆轉去減息，對於美股嚟緊嘅投資策略，都係要靈活走動，高沽低買。

至於港股調整持續，古天后上周五已講過，周五走勢相當關鍵，若然未能承接上日升勢，收復10日及20日線，短線調整持續，下試50日線及250日線機會大增，兩者分別處於20500至20100水平，嚟到呢啲位，或者係吸納優質股嘅機會，而古天后當然唔會錯過ATMJ，港交所(00388)跟百度亦喺購物單上，至於生科股則選擇信達生物(01801)及康方生物(09926)。留意宣布供股嘅領展(00823)今日定必低開，不過有關領展嘅投資方向跟策略，暫時睇唔到管理層做得有幾好，為咗增加回報，近年刻意買入海外項目，12月以約4.9%回報率買入新加坡商場，代價125億元，公司要集資亦唔意外。不過海外項目藥石亂投，反而令領展失去本身集中經營本港民生商場嘅穩定特色，要投資海外物業，倒不如直接買入海外市場嘅REITs，為乜仲要考慮亂無投資章法嘅領展呢。