古天后日誌｜港股現水平重現吸引力惟成交未能配合

2月23日，天晴，早晚清涼，天氣乾燥。隔晩美股表現反覆，2月份FOMC會議紀錄顯示，委員支持繼續加息，以壓抑通脹為主要目標，三大指數納指喘定，升14點；但道指跌84點；標指更連跌四個交易日，跌6點。雖然美股喺走勢上未能突破旗型向上，不過美國經濟今年陷入衰退機會有限，美股仍然可以逢低收集，只要企業盈利表現唔係太差，業績交到功課，美股再大跌機會唔大。

目前市場仍然係由息口走勢主導，雖然10年期債息重返3.9%水平，但2年債息未升破去年高位4.81%，市場仍然推算美息可能喺5.25%見頂，但喺通脹回落速度不及預期下，今年下半年減息機會大減，可能要待明年初先有機會減息。而10年債息目前處於3.91%，自然令股票吸引力大減，除非企業盈利出現大幅增長。

百度(09888)噚日喺港股收市後公布業績，業績表現優於預期，同時公布50億美元回購計劃，但股價先升後回軟，似乎百度要真金白銀喺市場回購，股價先有望回升。百度一直被市場認為公司隨波逐流，每當市場有邊種業務或技術興起，公司就會表示要發展，反而忽略本業。而最近公司亦表示將參與AI發展，就吸引北水入場。百度嘅AI業務如何，暫時都係未知數。百度只係由資金主導上落，大家跟勢炒作，注意嚴守止蝕，若然真心想投資有關AI前景嘅股份，美股嘅微軟跟Google肯定較為堅實。

至於港股喺2月份由高位調整，由22700水平跌至現水平，已下跌超過2000點，2月份嘅波幅，已足以滿足單月波幅要求，而港股逼近20000水平，亦重現吸引力，呢啲水平開始再收集重磅指數股，係一個唔錯嘅切入點，除非大市跌穿250日線未能於兩三日之內收復，否則現水平買貨，應該有一定防守力。問題係港股暫時亦欠缺成交支持，噚日成交亦只有1146億元，暫未見新錢流入，要大幅推升港股似乎無乜可能。若然有心儲貨，亦要有耐性等待，下月初內地兩會舉行，或會借消息拉上，但升勢能否持續，仍然要靠成交配合，到時就只有見步行步。