古天后日誌｜港股暫無炒作焦點 能企20及50日線繼續向好

3月7日，天晴，天氣乾燥，日間溫暖。隔晚美股表現反覆，早段喺美債息回落下，納指一度反彈逾1%，但午後美息回升，納指倒跌13點收市，道指跟納指則保持40點及2點升幅。標指阻力仍然喺4100左右，今明兩晚鮑爺將出席聽證會，市場憂慮鮑爺隨時又放鷹。除咗鮑爺要出席聽證會，周三有小非農數據，周五輪到非農數據，市場仍要觀察美國就業市場表現。雖然各大企業相繼裁員，但過去幾個月美國就業市場保持強勁，1月份失業率降至3.4%歷史低位，反映美國經濟未至於太差，陷入衰退機會唔大，經濟有機會軟著陸。不過正因為美國就業市場保持強勁，令聯儲局不得不維持較緊縮貨幣政策。

至於中港股市呢邊，噚日無乜方向，兩會定下今年內地經濟GDP增長目標為5%，A股暫時反映有限，講到底同港股一樣缺水，外資喺1月份錄得淨流入1777億元，但2月淨流入大幅縮水至549億元，3月呢個星期則為175億元淨流入。雖然連續三個月錄得淨流入，但市場景氣度一般，資金只係短炒，小打小鬧，作為A股領先指標嘅創業板指數，未見起色，龍頭寧德時代偏弱，A股維持弱勢。

港股呢邊一樣了無生氣，雖然連續兩日錄得上升，打破升一日跌一日嘅頽勢，可惜成交額只有1100億元，買賣兩閒，市場亦缺乏炒作焦點。除非有新資金流入配合升勢，否則大市仍然吽吽逗逗。呢兩日大市要盡快企上去20日線，再挑戰50日線，若然成事能企穩21000，下一目標為21300-21600。