古天后日誌｜歐美銀行股急挫逼使央行提前減息

3月16日，大致天晴，日間乾燥，天氣和暖。隔晚歐美股市大地震，今晚歐洲央行議息，前，隔晚淡友同空軍出動，瑞信(CS)被惡意沽空，股價急跌三成，拖累歐美金融股大跌，道指盤中一度跌逾700點。幸而美股收市前，瑞士央行終放風表示支援瑞信，並為其提供流動性，美股跌幅收窄至280點，標指跌28點；納指更倒升5點。標指暫時仍未走出3800至4200呢個區間，每每接近3800range底，即見有資金吸納。

自SVB引發嘅美國中小型銀行擠提，再發生隔晚CS股價急跌，暫時古天后認為都唔會演變為2008金融海嘯2.0，SVB流動性問題已解決，雖然銀行最終可能面對拆骨及賤賣資產收場，但至少其問題唔會引發整個金融系體風險。至於CS早於去年Q1已因為虧損需要大幅撇帳，但管理層卻拖至去年Q4先嚟低價配股，當時沙地銀行入股瑞信。隔晚就係有消息指沙地銀行唔再支持瑞信，令其股價於盤前急跌三成，但見低位有大量沽空盤買入，淡友空軍順利透過消息袋袋平安，瑞信收市跌幅亦削半。所謂嘅海嘯2.0，到頭嚟只係空軍透過消息去壓低金融股股價，所引發嘅信心危機，而多過實際上系統性風險發生。

淡友做瓜金融股搵食，市場大戶亦樂見呢啲小問題所引起嘅信心危機，因為歐美央行要穩定市場信心，停手加息兼提早減息。估計喺歐美金融股暴瀉後，今晚歐央非但唔能夠再強行加息0.5%，再睇埋德國年息率由2.77%急至2.137%，歐央行甚至有機會掉頭減息0.5%。至於美國10年債息，及美國半年國庫債券息率亦急挫，唔排除今年下半年開唔有機會減息，而3月及5月議息有機會維持息率不變。只要加息周期完結，本來流動性不缺嘅歐美股市，大有機會喺下半年回升，美股市場仍然係可以逢低吸納。至於港股市場，喺外資放棄後，外圍下跌嘅時候跌突，外圍回升又跟唔足個升幅，捨難取易，難怪資金更鍾情美股，而港股喺缺乏資金下，繼續一潭死水。