古天后日誌｜經濟復甦不似預期 港股或迎來五窮六絕

4月27日，大致多雲，早晚天氣清涼。隔晚美股個別發展，微軟公布業績後，股價向上，帶動納指回升55點，但FRC績後股價急跌，隔晚股價再跌三成，拖累銀行股表現，道指亦由升轉跌，收市跌228點，標指亦跌15點收市。其後Facebook母公司META收市後公布業績，表現好過預期。公司廣告收益同比增長4%，扭轉連降跌三季弱勢，相信已走出谷底。不過盈利未能跟上，跟GOOG一樣，當中包含因裁員作出的嘅一次性支出。而Facebook日活人數突破20億，再創新高，未來營收仍能看高一線。公司早已表示開始縮減元宇宙支出，但未來幾季仍會錄得虧損，估計要到Q3先開始錄得盈利回升。META業績市場收貨，盤後股價急升逾一成。美國業績期接近尾聲，銀行股嘅表現反映市場對銀行信心危機仍未解除，而嚟緊一段時間，銀行貸款將步入收縮期，企業融資成本增加，或有機會引發中小型企業倒閉潮，不得不留意。

至於港股呢邊，今日期指結算，噚日港股經過連跌幾日，恒指由20700水平跌逾千點後，噚日終見反彈，但成交額全日不足1000億元，可想而知嚟到低位，都未見資金肯入場大手買貨，噚日嘅反彈，只不過係大戶喺期指結算前，大戶托住指數轉倉，並唔係有買盤吸納嘅反彈。

港股之所以咁弱，同實體經濟復甦不似預期有關，雖然經濟已重啟超過一季，但唔少中小企開始選擇離場，廣東道未能回復過往人山人海嘅情形，反而空置率仍高於5%。至於勉強撐落去嘅，喺人手不足，工資上漲及高通脹之下，亦只係吊緊鹽水。

至於樓市仍被辣招掣肘，商廈跟商舖空置率雖有改善，但租金大幅下降，過往業主收租稱王嘅日子一去不復返。至於股市更加係一潭死水，成交持續萎縮，新股亦未見活躍，股市復甦未見兌現。

中港經濟重啟後，復甦只係強預期，弱實現，以本港旅遊業為例，來港內地訪客多集中中低端消費群，主打低價團，企街邊食兩餸飯。過往大手掃名牌嘅高消費旅客不復見，主要係內地已不缺奢侈品供應，高端消費旅客索性留喺內地，又或到其他海外地區旅遊消費。近期傳出有大型國際奢侈品集團已將部分品牌地區總部由香港遷往上海，香港過往優勢已不復再。

樓市方面，新盤開價較同區二手樓價折讓，發展想寧願賣平少少都要清貨，二手樓劈價蝕讓個案更比比皆是。偏偏政府一直不撤辣招，對坊間訴求充耳不聞。即使政府賣地亦頻頻流標及以低價成交，賣地收入大大縮水。

過往香港主要靠國際資金支撐，但如今外資一去不復返，從港股成交可見一班。內地經濟形勢未明、國際地緣政治風險因素不斷上升，中美之間角力令投資者對港股卻步。中國資產吸引力下降，融資活動備受估值不振及需求下降拖累，外資已從港股撤退。單靠中資唱「獨腳戲」，港股流動性不足已成重大缺陷，咁嘅情況之下，港股自然易跌難升，唔排除踏入五窮六絕月，港股或出現一波下調走勢。